71
Mi no ta mucho preocupa cu e carta di Caft pasobra nos ta cumpliendo!
Den e dianan aki tin hopi comocion entorno un carta di Caft cu a sali publica.
Prome Minister Evelyn Wever-Croes a duna su reaccion riba esaki.
“Mi a anuncia e posicion di Caft aki basta dia caba. Cu nos ta satisfecho cu nos a logra mantene e deficit di 2018 cu Parlamento a aproba. Parlamento a aproba un deficit di 149 miyon pa 2018, y ta mustra cu pa fin di aña e lo ta 147 miyon. Pues nos ta dentro di e norma y esey ta e meta di e ley di Caft. Manera mi a anuncia siman pasa caba den conferencia di prensa, Caft ta di un banda satisfecho cu nos a mantene e deficit, pero di otro banda kier pa nos hasi mas.
GAST DI PERSONAL
Mesora mi a bisa tambe cu nos no por hasi mas na e momentonan aki. Nos a hasi tur locual ta humanamente posibel y awor no por hasi mas. Pa otro aña nos por cuminsa mira e resultadonan berdadero di nos maneho y manera ta stipula den e presupuesto, e gastonan ta baha pa prome biaha cu 6 miyon florin.
DIALOGO CU HULANDA
Mientras tanto mi ta sigi den dialogo cu Hulanda pa mustra nan riba nos maneho. Nos mes a stipula un maneho cu ta realistico, nos tabata transparente den tur cos y no a gaña, y esaki mester forma e base pa confiansa. Awe mi a reuni cu Secretario di Estado Knops riba e tema financiero. E reunion a bai bon, y e tambe ta realisa cu Aruba ta hasiendo hopi esfuerso pa stabilisa finansas di nos pais. Tocante e posicion di Caft: manera mi a bisa, mi no ta preocupa. Caft tin su rol y responsabilidad, un rol cu nan a faya den dje ultimo añanan.
Nos tin nos rol y nos responsabilidad y nos si no kier faya den esaki. Den tur nos decisionnan nos ta pone e ser humano prome. Mi tin tur confiansa cu nos ta sali afo” Prome Minister Evelyn Wever-Croes a duna di conose.