Oranjestad; Awe 20 di November, dia cu mundialmente ta celebra “Dia Universal di Mucha”. Prome Minister Evelyn Wever-Croes pa e ocacion aki, ta brinda su mensahe pa tur di reflexion na nos pueblo henter.
“Awe ta un dia pa nos tur refleha profundamente riba significado di e dia aki y e rol cu nos como mayor, familiar y adulto tin cu nos muchanan.
Laga nos awe refleha riba e ehempel cu nos ta duna nos muchanan. Ta hopi importante pa nos sa cu cada cos cu muchanan ta mira un mayor, tio of tia, abuelo of abuela haci nan kier sa y nan ta keda corda. Nan ta explora continuamente pa nan descubri y siña pa despues nan por ripiti y desaroya.
P’esey ta asina importante pa loke nos ta haci pa nan of nan dilanti ta ehempelnan positivo di amor, pasenshi, creatividad y apoyo pa nan. Asina cada un di nos ta contribui positivamente na nan crecemento, desaroyo y felicidad.
Nos Gobierno a caba di cumpli nos prome aña di gobernacion y durante e promer simannan di nos periodo, nos comunidad a ser sacudi pa e sucesonan dramatico cu a tuma bida di dos hobensito. Despues a sigui mas casonan tragico cu a trece na superficie e profundidad di e crisis social cu un parti grandi di nos pueblo ta bibando. Esakinan ta informacion y realidad cu gobernacion anterior a scoge pa tene atras. P’esey awe ainda nos comunidad ta ser conmovi pa actonan di violencia cu ta tuma bida di hobennan y adulto. Diferencianan di opinion ta escala y desemboca den conflictonan cu despues nos tur ta lamenta.
Mi kier pidi awe un antencion special pa e Dia Universal di Mucha; laga nos haci di cada dia nan dia, laga nan presencia mey mey di nos ta un inspiracion pa nos tin mas respet pa otro, mas pasenshi y tolerancia, stimacion y pordon, no solamente cu nan pero cu cada persona den nos famia y comunidad. Madre Theresa a yega di bisa; “No ta tur di nos por haci cosnan grandi, pero cada un di nos por haci cosnan chikito c’un amor hopi grandi.” Pesey awe y tur dia ban haci cada acto pa nos muchanan cu un amor grandi y sincero, pasobra pa nan cada cos ta importante. Brasa y sunchinan awe yen di amor pa nan sinti y semper corda cuanto nos ta stima nan y cu nos t’ey pa proteha nan na tur momento.
Tin un bunita cancion di fin di aña cu ta zonando hopi na nos radionan den e dianan aki. E ta canta pa un hobencita, e letranan a conmove mi masha hopi; “No mas abuso mi ruman ban uni voz den oracion, e Redentor ta e refleho di amor. Tene man di bo ruman, no mas odio y rencor, ban haci di Aruba un pueblo di Amor.” Pabien Yadien Croes cu e bunita cancion y mensahe cu ta duna nos animo y forsa.
Mi ta desea tur mucha y nan famia, scol y organisacion cu ta atende cu nos muchanan un feliz y creativo dia Universal di Mucha awe, ban ser un bon ehempel pa nan pa asina nan por crece y bira hoben y adultonan ehemplar di nos comunidad”.
Esakinan tabata palabranan di Minister President Sra. Evelyn Wever Croes na ocacion di celebracion di e dia special aki, dia Universal di Mucha celebra rond mundo y reconoci pa Nacionnan Uni.