Diahuebs awor ta celebra na diferente parti na mudo dia di Gracia of Thanksgiving Day. Hopi hende ta pensa riba e temporada pa haci compras pa fin di aña pero tambe den su esencia e ta un dia pa pensa riba esnan menos afortuna. Cu e intension aki den mente,
Parlamentario Setty Christiaans-Yarzagaray hunto cu su team ta organisa un actividad cu meta caricativo.
Ta un bunita momento pa duna bek na comunida! Apesar cu pa haci obra di caridad no mester temporada, a scoge diadomingo awor y den e dianan aki cu ta bay celebra dia di Gracia y cerca di dia di Pasco di Nacemento como e momento pa haci un actividad di recaudacion di fondo. “Di pensamento semper mi a kere den duna bek y haci obranan”.
Esaki sigur hendenan cu conoce e Parlamentario di cerca sa esaki. Pero awor ta desea di haci esaki na un manera mas grandi y involviendo mas hende. Naturalmente tur fondo recauda lo bay na donacion y lo wordo entrega na dos diferente instancia den comunidad.
E festival di sopi lo tuma luga diadomingo awor dia 25 di november entre 12’or di merdia y 3’or di atardi na Cede di MEP na Santa Cruz. Prijs pa ticket lo ta 10 florin pa ticket y lo bay tin 5 diferente sabor di sopi. Lo bay tin sopi di carni, galiña, pampuna, mondongo y e famoso sopi’ oester di Setty. Lo sirbi sopi tantempo cu tin den stock pues pasa busca bo sopi sin falta paso op is op. Naturalmente tambe tin e oportunidad pa cumpra ticket cu e obhetivo di contribui na e donacion na e instancianan. Di antemano, Parlamentario Setty Christiaans-Yarzagaray ta gradici tur esnan cu ta coopera cu e gesto bunita aki.