Un plataforma mas eficiente y efectivo na beneficio di futuro di Aruba
Diahuebs mainta a tuma luga e prome ‘eGovernment & Digital Transformation Workshop’. Den e sesion aki varios departamento di Gobierno, conseheronan di Minister, NGOs y diferente otro stakeholders a participa na e prome ‘think-tank’ pa hunto determina e vision pa desaroya un plataforma di ‘eGovernment’ eficiente y efectivo pa beneficia comunidad henter. Tambe nos por a conta cu participacion di oradornan internacional, cu tin hopi conocemento y experiencia cu diferente paisnan den e tema di ‘eGovernment’, entre otro Estonia y Australia.
Prome Minister Evelyn Wever-Croes na e ocacion aki a duna un discurso cortico expresando na prome luga su satisfaccion y alegria di wak e entusiasmo y compromiso cu esnan concerni tin cu e iniciativa importante pa Gobierno di Aruba.
“Tempo cu mi a asumi cargo casi un aña atras, nos tawatin un vision. Un vision pa transforma nos Gobierno den un Gobierno di futuro door di Transformacion Digital, pa asina brinda miho servicio na nos ciudadanonan. ‘e-Government’ tin hopi beneficio pero na final di dia, e ta trata di e ser humano. Gabinete Wever-Croes ta comprometi pa enfoca riba un maneho pa pone e ser humano central como tambe riba un maneho na unda niun hende lo wordo laga atras.
Desde principio, nos Gobierno tawata sa cu esaki lo ta un reto grandi. Pero cu e conviccion cu nada cu ta valioso ta bin sin su retonan. Pero tambe nos ta convenci cu tin oportunidadnan. Awo nos tin e oportunidad pa haci’e bon pa futuro y pa e futuro generacionnan.
E decisionnan cu nos tuma awe, dentro di algun luna y of e aña siguiente, lo ta sumamente importante pa establece e direccion di futuro pa construi un fundeshi solido, sea tehnico of capital, pa asina nos bira e Gobierno di futuro di nos meta. Di e manera aki, nos lo duna ehempel na otronan tambe.
Nos vision pa Aruba no solamente ta pa nos bira un eGovernment 24/7 pa mehora bida di comunidad, sino tambe pa nos por crece y bira un modelo cu por wordo comparti cu e resto di mundo. Desaroyo di ‘eGovernment’ ta yuda tambe cu e desaroyo di nos Conocemento Economico, y tambe lo ‘boost’ e economia.
Mi sa cu esaki no ta bay ta facil y cu tin un caminda largo pa cana. Pero nos lo concretisa y realisa e plan di accion aki den fasenan cu e sosten di tur stakeholder”, tawata palabranan constructivo di Prome Minister durante e workshop.