ORANJESTAD – “Despues di mas di 40 aña, Ley di Ortografia di Papiamento ta bira un realidad”. Asina parlamentario pa partido MEP, Sue-Ann Ras a bisa, na vispera di e fecha riba cual lo pasa e ley nobo riba e tema, esta awe, diahuebs 1 di november 2018 den Parlamento. “Despues di hopi aña di trayectorio awe e lucha di hopi hende ta haya un luz y alabes forsa, pa sigui bringa pa nos idioma haya e status cu realmente e merece. E liña di historia ta hopi largo y Papiamento a keda na bida pa mas di 300 aña”, e parlamentario ta bisa. Esaki sigur no tabata posibel, sin e lucha incansabel di hopi actor y e pueblo di Aruba en general, cu a duna bida y forsa na nos idioma Papiamento.
1976 LEY DI ORTOGRAFIA
Si sigui e liña di historia, ta mira cu nos ley di ortografia di idioma Papiamento ta data for di 1976. Tabatin 4 factor cu a forma e base di nos Ortografia 1976:
1. E deseo di pueblo, 2. Tradicion, uzo y custumber, 3. E posibel futuro idioma oficial, 4. Cierto tendencia renovador.
Segun Ras, semper ta tene cuenta cu e 4 puntonan aki, no mas cu punto 3, ta esun cu mas a conoce cambio, mirando cu e situacion no ta esun di mas di 40 aña pasa. Y si nos bay bek den historia, den e reunion di Conseho Insular di dia 29 di october 1976, a haci mencion tambe di e echo, cu e Ortografia di 1976, mescos cu cualkier ortografia na mundo, ta suheto na desaroyo den futuro. Den liña grandi esaki ta loke Sr. G.F. Croes, Sr. F.H. Croes y Sr. G.P. Trinidad a duna di conoce durante e reunion.
2004 ORTOGRAFIA ADAPTA
Cu esaki nos por mira, cu 3 persona clave mes a indica cu cambio den ortografia ta algo di spera y cu mester ta habri pa dialoga y yega na loke ta mas cerca di nos pueblo, sin perde e esencia di ta etimologico. P’esey mes a bin cu un Ortografia Adapta di Papiamento na aña 2004, cu tabata mas un ‘ortografia di transicion’, cu tabata tene cuenta cu e desaroyo dinamico actual di Papiamento di Aruba, y cu ta refleha, di un banda, forma diferente di pronuncia y, di otro banda, forma diferente di skirbi cierto palabra. Ortografia Adapta tabata flexibel y tabata permiti dos forma ortografico pa cierto palabra, mirando cu e meta principal NO tabata pa standarisa palabra, sino scoge formanan ortografico, cu tin e mesun pronunciacion, manera por ehempel: -ou/-ao, -ansa/-anza, cien/shen, pero no ta pa tur caso tampoco. Den e version mas recien ainda tin e opcionnan, kiermen pa e banda ey, e ortografia di 2004 no a cambia.
2007 SENTIMENTO POSITIVO
Cu e peticion relaciona cu uzo di e reglanan revisa y amplia di Ortografia di Papiamento, anticipando e formalisacion legal, Parlamento den su reunion di Comision Central di dia 6 di juli 2007 a expresa su sentimentonan positivo pa loke ta e peticion di e Minister concerni di e tempo ey. Parlamento tabata spera cu riba un termino cortico e proceso legislativo lo keda inicia. E proposicion tabata pa purba di traha menos posibel cu dos opcion.
2017 y 2018
Na 2017 e concepto di ley a yega porfin. “Na 2018 Departamento di Enseñansa (DEA)a haci un presentacion na Parlamento y finalmente a dicidi pa scoge un fecha pa e ley aki pasa, cu ta 1 di november 2018”, Ras a finalisa bisando. Segun e parlamentario, keda pendiente pa mas informacion riba e envolvimento di nos dushi Papiamento den un proximo articulo.