ORANJESTAD – Tin un dicho cu ta bisa, ‘un deportista mas ta un delincuente menos’. Pa minister Dangui Oduber, e dicho aki ta un berdad y ta pensa cu si enfoca riba deporte debidamente, Aruba lo tin miho ciudadanonan den tur aspecto di palabra.
“Deporte ta un instrumento di multi uzo. E ta yuda tanto den e aspecto di salud como tambe esun social. E parti mas bunita di dje, e no ta importa e edad, sea hoben of pensionado, bo por saca probecho for di deporte”, minister Dangui Oduber ta expresa. Cerca personanan mayor di edad, practica un deporte ta mantene nan fisicamente y mentalmente mas fuerte. Pa e hobennan, e ta nifica entre otro cu ta wanta nan for di riba caya.
Practicando deporte, un persona ta siña disciplina, responsabilidad, confianza den su mes, sacrificio y co-dependencia. Sin laga afo e amistadnan cu bo ta crea, cual bo ta bay bida largo cu ne. “Kico miho cu un persona cu tin e cualidadnan aki?”, minister Dangui oduber ta puntra. Un persona cu tur e cualidadnan aki, ‘ta cos bon so e lo haci pa su mes y pa su isla’. E mandatario ta bisa cu e pensamento aki ta netamente locual ta forma e fundeshi di e maneho cu e ta hibando pa deporte.
Minister Dangui Oduber ta bisa cu lastimamente na e momento aki e energia ta hinca den drecha y pone stret tur e desaster cu e gobierno anterior a laga atras. Mester entre otro drecha facilidadnan deportivo y duna coachnan miho instrumentonan pa nan uza. “Mi no por caba di compronde con un persona por a carga un puesto di minister y no a percura pa algo asina importante pa nos tur, manera deporte, cana nechi y na benificio di henter e pueblo.”
Finalmente e mandatario ta bisa cu pueblo por tin e confiansa cu su persona, den calidad di minister ta haciendo tur cos posibel pa tanto grandi como chikito por gosa di e instrumento yama deporte.