Pa di cinco aña consecutivo un grupo di studiantenan di Hogeschool Rotterdam ta na Aruba. E aña aki ta toca turno na e area di Eagle. Durante e dos simannan proximo e studiantenan aki di lo ricibi lectura for di diferente persona y instancianan manera entre otro: Monumentenbureau, TNO, Fundacion Museo Arubano, Sr. Jaap Beaujon, Aruba Ports Authority Academy of Fine Arts & Design, House of Mosaic y Stichting Monumentenfonds Aruba.
Despues di e lecturanan nan lo traha intensivamente riba nan proyecto creando asina un plan pa e area caminda ta stimula desaroyo di e area pero sin cu e historia bay perdi.
E studiantenan ta kedando den e area di Eagle mes na cas di Sr. Beaujon cu a pone esaki disponibel pa e dos simannan aki. E cas ta un di e casnan original cu a keda construi pa Arend en Petroleum Company. E diseño di e casnan den e area aki cu ta original ainda ta di arkitectonan di e compania di petroleo mes y tin rasgonan di casnan di tempo di Nederlands Indië. E casnan aki a keda construi pa e directornan y trahadornan di e compania y despues cu esaki a bay di Aruba e lokalnan mes por a adkiri e casnan aki.
Na final di e workshop e studiantenan lo presenta e resultado di nan investigacion, nan plan y ideanan pa e area. Esaki lo tuma lugar dia 5 di november. Si tin hende cu tin fotografianan di e area di antes of informacion y kier comparti esaki por tuma contacto cu Stichting Monumentenfonds Aruba na 582 4014 of [email protected]
Stichting Monumentenfonds Aruba ta gradici na tur e personanan y instancianan cu ta coopera pa haci e workshop aki posibel. Danki na Sr. Beaujon, Superfood, House of Mosaic, Eagle Roofing y MVC Eagle