Dia 1 di november 2018 Parlamento lo bay trata e ley di ortografia di Papiamento
ORANJESTAD – Minister di Finansa, Asuntonan Economico y Cultura a hiba palabra durante di e Conferencia Papiamento Idioma Oficial, cu ta tuma luga fin di e siman aki. E conferencia ta wordo organisa pa e Plataforma Union di Papiamento na ocasion di celebracion di 15 aña di Papiamento como idioma oficial na Aruba.
Minister Ruiz- Maduro a remarca cu ta cu sumo placer na comienso di e aña, como Minister di Cultura hunto cu Minister di Enseñansa, a proclama na nomber di Gobierno di Aruba, e aña aki como ‘Aña di Papiamento’. Esaki ta pa conmemora cu dia 21 di mei 2003, Parlamento di Aruba a aproba e ley pa haci Papiamento e idioma oficial di Aruba, banda di e idioma Hulandes. Alabes Minister Ruiz-Maduro a anuncia cu diahuebs proximo dia 1 di november 2018, lo bay tuma luga un reunion publico durante cual Parlamento di Aruba lo bay trata e ley nobo riba e forma di skirbi Papiamento.
Minister di Finansa, Asuntonan Economico y Cultura, Sra. Ruiz-Maduro a bisa tambe cu Papiamento su ortografia oficial ta existi apenas 15 aña y cu nos mester keda evalua e manera di skirbi Papiamento corectamente. Esey ta nifica cu regularmente nos lo bay encontra cambio y sugerencianan cu ta necesario pa nos por haci miho uzo di e reglanan pa skirbi nos idioma. Tambe como Minister di Cultura e lo bay duna tur su sosten na e trabaonan cu mester ser haci, pa pronto nos tin un adaptacion di e ‘Vocabulario Ortografico di Papiamento’ mihor conoci como e ‘Buki Blauw’. E vocabulario di papiamento aki ta hopi uza y e ta un medio hopi importante pa educa nos pueblo con pa uza nos ortografia corectamente.
Minister Ruiz-Maduro mes ta pone masha atencion riba e uzo di Papiamento. Como mandatario e ta hopi consciente di e importancia pa papia y skirbi su idioma materno, mas miho posibel.
Nos idioma Papiamento a desaroya mas di 350 aña pasa y nos mester realisa cu e ta un tesoro cu nos mester cuida hunto cu nos islanan ruman Corsou y Boneiro. Pesey Minister Ruiz-Maduro ta aplaudi e iniciativa di Plataforma Union di Papiamento pa a organisa e Conferencia Papiamento Idioma Oficial . E conferencia aki ta di suma importancia y necesario pa proteha y salvaguardia nos dushi idioma crioyo Papiamento.
Minister Ruiz-Maduro a remarca tambe cu Gobierno di Aruba lo aprecia di haya contribucion di nos expertonan di Papiamento pa por logra traha un Plan di Maneho di Idioma na Aruba.
Alabes e mandatario a gradici Plataforma Union di Papiamento pa organisa e conferencia aki y a gradici tambe esnan cu a contribui pa duna un presentacion. Minister Xiomara Ruiz-Maduro ta contento cu participacion di tur e islanan y ta sigur cu e discusionnan lo duna un aporte na desaroyo di nos dushi idioma Papiamento. Minister Ruiz-Maduro a termina bisando: “Cultura bo tin cu bib’e, Papiamento bo tin cu papi’e!”.