Den e ultimo dianan aki nos por a tuma nota cu gobierno, por medio di DIMAS, a bin ta duna diferente permisonan na personanan cu ta bin di Venezuela, basa riba e DIMAS-protocol, pero cu sigur ta lanta hopi interogatorio tocante otorgamentonan aki.
Atrobe ta resalta cu e maneho bou di e gobierno di AVPOR pa loke ta trata admision ta sigui mescos den e gobierno aki di POREDmep, y ta crea duda den e seriedad di e maneho. Na 2010 e.o. ministernan di AVPOR, particularmente Otmar Oduber, y nan parlamentarionan tabata haci tur esfuerso pa trata di convence pueblo cu mi persona lo a compromete Aruba pa otorgamento di permiso di estadia y di trabou na Ritz Carlton! E tempo ey mi a mustra cu si tin algo cu Aruba no ta comprometi na dje y no tin obligacion pa cumpli bou di tur circumstancia, ta e asunto di otorgamento di dicho permisonan.
E tempo ey mi a retanan di AVP pa “be a man not a mouse” y nenga permiso si di berdad bo kier mustra curashi y sali na defense di e trahadornan Arubano, particularmente ora tin yiunan di tera cu por haci e trabou. Esaki tabata e discusion tempo di Ritz Carlton, ya cu nan no tabata tin pia pa para riba ora cu no haya un permiso cu nan pidi. Awo nos ta wak cu CITGO tambe ta haciendo mesun cos y gobierno den un forma ILEGAL ta mal uzando un protocol cu a wordo crea tempo di Valero.
Nos tin documentonan cu ta mustra cu en todo caso dos Venezolana a haya contrato basa riba dicho protocol, pero ta wordo mal aplica, pa asina ey duna derecho despues na e personanan aki pa keda. Esaki dor di ta duna permiso pa un aña y obviamente cu nan por inscirbi na Censo y consecuentemente obtene un carchi di AZV. Esaki ta totalmente empugna cu e espiritu di e concepto di e asina yama “Dimas-protocol”. Y cu den nos opinion ta un corupcion administrativo. Pa colmo un di e personanan aki lo ta di dos biaha ta haya e permiso aki. Straño cu atrobe “geen haan die ernaar kraait”! Nos “Stempelparlament” den su TOTALIDAD ta “muisstil”, implicando cu tur e 21 parlamentarionan ta di acuerdo cu e gobierno di POREDmep NO ta integro!! Haci “oneigenlijk gebruik” di un protocol ta INTEGRO? No toch?
Tambe e pregunta ta, ki “toetsing” tabata tin di parti DPL pa wak si no tabata tin Arubiano, trahador local, pa ocupa e funccionnan di “Oil Movemente Rotating Equipment Engineer” y di “Financial Service Analyst”. E promer nos a comprende cu tin hende cu por haci e trabou aki y cu ta na cas. Y e di dos sigur lo tin hopi hobennan cu a termina na FEF aki na Aruba mes, cu lo ta carga speranza di haya trabou aki na Aruba. Pa colmo e persona cu ta firma e permiso aki, den nomber di Minister Bikker, ta e mesun persona cu den pasado tabata haci esaki den nomber di Benny Sevinger y kende mi a cuestiona severamente, esta Mario Wever. E hunto cu Radhi Kahn tabata percura pa fix mas tanto stranhero posibel yega na permiso. Esaki tambe ta algo cu ta cai bou “fixmento”?
Mescos cu mi a splica na 2010, tempo cu mi tabata minister, nos tabata tin un compromiso, mescos cu tabata tin cu Valero. Esta cu DIMAS lo por duna tur cooperacion pa ora cu NO tin Arubiano cualifica, pa un persona haya e permiso necesario y temporario. Esaki tabata wordo yama “Dimas-protocol”. E protocol aki a ser introduci pa regula e tramitenan ora cu tin proyectonan grandi (“project-gebonden”)! Y bou di cierto condicionnan e.o (articulo 3 y 4 di e protocol). Esta:
1) e proyecto mester tin un inversion di por lo menos 20 miyon dollar;
2) cu e permiso tin UN DURACION di 6 luna y cu e posibilidad di PROLONGACION di maximo 5 luna! (puest no por bay un aña);
3) cada persona cu haya un permiso (esaki den caso cu NO tin un yiu di tera) mester di un seguro medico y di riesgo (pues si e causa cualkier daño na Aruba e seguro ta cubri esaki);
4) e compania en cuestion mester entrega un manpower-planning;
5) last but not least esun di mas importante ta cu lo por otorga permiso di estadia y di trabou na momento cu NO por haya un yiu di tera cualifica cu por cumpli e trabou!
Pues un persona asina, a base di e protocol aki no por keda mas cu 11 luna. Y kico nos ta wak awo, gobierno ta permiti pa duna permiso a base di e protocol, pero pa 12 luna, esta un aña, cu defacto lo ta cambiando e indole di permanencia legal y cu lo por tin consecuencia cu cierto derechonan ta wordo crea pa aplica pa un permiso normal. Pues e persona por bay keda permanente y e funccion aki un yiu di tera lo no por bay cubri sin mas. Esaki ta INTEGRO??
Nos por mira cu poco dia ey cu minister di Husticia a anuncia, cambionan den maneho, unda a bay na agilisa e tramitenan pa duna permiso, mientras cu minister di Labor tambe a haci algun cambionan cu ta permiti otronan cu bin den cuadro di reunificacion di famia, tambe traha na Aruba. Na unda cu lo por trece full famia incluso “PACHI cu MACHI”!
Kizas e “Dimas-protocol” aki tambe a cambia pa “Protocol-dimas”! Mientras cu keto bay nos Arubianonan ta keda keha cu nan no ta haya trabou, otronan si ta haya e espacio pa esaki! Y aparentemente cu bon salario cu ta permiti nan biba den e un bario elitario. Mare nos Arubianonan por haya e trabounan aki cu por permiti nan biba den Gold Coast. Cu e maneho aki pronto e ARUBIANO lo desaparece! ARUBA, QUO VADIS!! #parawor
Booshi Wever
Lider UPP
Brazil 163
Aruba, 21 oktober 2018