Recien Minister encarga cu Enseñansa, Armando Rudy Lampe a anuncia un proyecto cual e Minister a considera di ta esun mas importante di e decada di enseñansa na Aruba. Ta trata aki di e Proyecto PEN, Plan Educacion Nacional 2018-2030. Na Hulandes esaki ta NOP, National Onderwijs Plan. Esaki ta e plan strategico pa enseñansa pa siglo 21.
E sistema di nos enseñansa mester cambia y keda na haltura na e desaroyonan nobo den siglo 21. Desaroyonan technologico ta bay asina rapido cu nos sistema di enseñansa no por keda manera cu e tawata den siglo 20. Cu e vision aki, Departamento di Enseñansa a cuminsa cu un proceso di consulta cu tur e stakeholders cu lo continua den e siguiente simannan pa asina yega na un plan definitivo pa enseñansa nacional pa 2018 pa 2030.
Minister Lampe a splica cu e motibo pa cua a pone e fecha 2030 ta cu e maneho di enseñansa di Gabinete Wever-Croes ta den concordancia cu e Metanan di Desaroyo Sostenibel (SDGs) di Unesco acorda pa huminidad henter pa yega 2030 cu resultadonan favorabel. E meta number 4 di SDGs ta Calidad di Enseñansa. Ora nos ta papia di hisa calidad di enseñansa como meta hunto cu Unesco y tur pais na mundo, a acorda cu esaki ta fundamental pa futuro di nos muchanan. No tin futuro sin un bon educacion. Esaki ta pone nos pensa mesora riba e ‘21 Century Skills’, ‘E Habilididanan di Siglo 21’. E concepto nobo aki ta encera pensamento critico, creatividad, comunicacion entre otro habilidadnan stipula pa yuda tur studiante den nan formacion den siglo 21. E Habilididanan di Siglo 21 ta e topico di actualidad y e demanda di comunidad ta mustra tambe cu comunidad ta pidi y ta cla pa desaroyo den enseñansa aki pa e formacion di nos muchnan.