ORANJESTAD – Aruba a yama bonbini na un total di 809.314 bishitante ‘stay-over’ durante e prome 9 luna di 2018. Esaki ta 1.5% (+11.857 turista) mas compara cu e mesun temporada pa 2017. Si exclui e bishitantenan di Venezuela, por mira un aumento di 6.6% (+48.005 turista) cual ta igual na un total di 774.449 bishitante pa nos isla. E cifranan ta indica crecemento den mercadonan clave pa Aruba, manera Merca, Canada, Colombia pero tambe Chile y Italia, entre otro. Pa september, Aruba a ricibi un total di 76.017 bishitante stay-over, cu ta 2.1% (-1.627 turista) menos compara cu e mesun luna aña pasa. Excluyendo bishitantenan di Venezuela, por mira cu esaki ta 6.7% (+4.408 turista) mas cu ta igual na 66.090 bishitante pa nos isla pa september 2018.
Turismo ‘stay-over’
Aruba ta wordo representa den tres diferente continente. Compara cu september aña pasa, pa 2018 e turismo procedente for di e continente Norte Americano a aumenta cu 8.2% (+3.778 turista/total 49.715 turista) y a trece 65.4% di total di turismo pa nos destinacion. Na september, Merca a aumenta cu 8.4% (+3.648 turista/total 47.277 turista) y Canada a aumenta cu 5.6% (+130 turista/total 2.438 turista) compara cu e mesun luna na 2017. Di januari pa september 2018, Norte America a trece 597.607 turista pa Aruba, cu ta un aumento di 7.5% (+41.559 turista).
E continente Latino Americano a baha cu 24.4% (-4.953 turista/total 15.311 turista) unda Venezuela a baha cu 52.2% (- 6.035 turista/total 5.519 turista) compara cu september aña pasa. Colombia a aumenta cu 31% (+593 turista /total 2.507 turista) y Brazil a baha cu 23% (-407 turista/total 1.359 turista). Tambe nos por mira un aumento for di Chile cu 43.7% (+439 turista /total 1.443 turista). E continente di Latino America a trece 20.1% di e total di turismo pa luna di september na nos isla. Di januari pa september 2018, Latino America a trece 119.608 turista pa Aruba, cu ta 20.4% (-30.662 turista) menos compara cu e mesun temporada aña pasa.
Pa loke ta Europa por nota cu turismo a baha cu 5.9% (-525 turista/total 8.327 turista) compara cu e mesun luna di september aña pasa. Reinonan Uni a baha cu 41.2% (-1.070 turista/total 1.529 turista). Manera informa anteriormente door di e asina yama ‘BREXIT’ na Inglatera, TUI a haña nan mes obliga di cancela un di e dos charternan for di e destinacion aki, pa Aruba. Por mira cu e perdida di 7.500 asiento y e caida di e mercado di Reinonan Uni ta wordo compensa cu crecemento for di otro paisnan. Mayoria di esaki ta cu e di 7 vuelo adicional pa siman di KLM cu A.T.A. a logra confirma desde november aña pasa. Ademas, TUI Hulanda a subi nan cantidad di asiento pa Aruba pa asina A.T.A. Europa ta keda contribui na crecemento di turismo di calidad pa nos destinacion.
For di otro paisnan Europeo; Hulanda a aumenta cu 0.6% (+18 turista/total 2.981 turista) y Alemania a aumenta cu 2.1% (+13 turista/total 641 turista). Ademas nos por mira un aumento for di Italia cu 21.5% (+306 turista/total 1.729 turista). E continente Europeo a representa 11% di turismo pa Aruba pa luna di september. Di januari pa september 2018, Europa a trece 65.445 turista pa Aruba, cu ta 2.2% menos (-1.438 turista) compara cu e mesun temporada aña pasa.
Turismo Crucero
Durante september 2018, 41.014 pasaheronan crucero a bishita nos destinacion riba un total di 13 diferente barconan crucero. Compara cu luna di september aña pasa, turismo crucero a aumenta cu 71.9% (+17.151 turista crucero): na september 2017 Aruba a haya 23.863 bishitante for di 12 crucero. Pues 1 barco crucero mas cu aña pasa.
Di januari pa september 2018, un total di 568.261 pasahero crucero a bishita Aruba (un aumento di 5.8% / +31.173 pasahero mas) riba un total di 228 diferente crucero (un aumento di 1.3% :3 barco mas).
Tourism Receipts / Central Bank of Aruba
Di acuerdo cu Banco Central e asina yama ‘Tourism Receipts’, pa aña 2017 a contribui cu AWG 3.078.5 miyon den nos economia, cu ta un aumento di 6.5% compara cu e mesun temporada na 2016.
Hotelnan / AHATA
Segun Aruba Hotel and Tourism Association pa e luna di september 2018, e ‘Average Daily Rate’ (ADR) a aumenta cu 16.2% compara cu september 2017 Esaki den cifra ta US$ 178.77 na 2017 compara cu US$ 207.66 pa 2018. Di januari te cu september 2018, ADR a subi cu 11.5% y den cifra esaki ta US$ 269.08. E entrada pa camber disponibel, e asina yama RevPAR a aumenta cu 4.7% di US$ 151.37 na september 2017 pa US$ 158.48 na september 2018. Pa e prome 9 luna di 2018 RevPAR a aumenta cu 11.7% – US$ 230.23
E anochinan ocupa (ORN) pa camber a baha cu 8.3% pa september 2018. Pa e prome 9 luna di 2018 ORN a aumenta cu 0.2%.
E prome 4 luna di 2018 e cifranan di AHATA ta basa riba 14 propiedadnan incluyendo Holiday Inn Resort y mayoria di e hotelnan cu excepcion di Hilton Aruba Caribbean Resort & Casino. For di mei 2018 e cifranan ta basa riba 13 propiedad – excluyendo Holiday Inn Resort. For di augustus 2018, e cifranan ta basa riba 15 propiedad, incluyendo Boardwalk Hotel y Brickell Bay Beach Club.