Den declaracion duna dilanti edificio di SERLIMAR na Pos Chiquito, Parlamentario Mike de Meza a lamenta masha hopi mes cu Gobierno no ta cumpliendo cu pago di e prima di pensioen di e fondo di APFA pa empleadonamn di SERLIMAR.
Mas ainda, pasobra despues di tres luna sin cu e pago aki ta wordo haci, ta core e riesgo cu e empleadonan ta bay wordo saca for di e fondo.
“Esaki ta algo masha serio mes. P’esey tambe mi a keda hopi straña cu te ainda e sindicatonan no a bin dilanti pa denuncia e asunto aki cu ta algo fundamental.”
E Parlamentario a splica cu ora su partido a drenta Gobierno na aña 2009 nan a topa cu un situacion unda cu tur e fondo social di Gobierno tabata den problema hopi grandi. Y e Parlamentario a menciona AZV, SVb pero tambe APFA. E tempo ey APFA tabatin un grado di cobertura di 72% y tabatin un deficit di casi 1 biyon florin.
E motibo tabata cu e structura no tabata uno viabel mas. Y MEP cu a goberna for di 2001 pa 2009 no a haci net nada pa trece cambio den e structura, mirando e “vergrijzing” cu tabata visto.
Tambe tabata asina cu pagonan di Gobierno no tabata wordo haci y no a tuma ningun accion tampoco pa drecha e structura pa motibo cu mester a tuma decisionnan inpopular.
“Ora cu bo ta gobernante bo mester tuma e decisionnan necesario pa scapa fondonan asina importante manera pensioen di trahadonan. “
El a recorda cu bou di Gabinete Mike Eman I a haci e cambionan necesario cambiendo e eindloonregeling pa un middenloonregeling y a aumenta e edad pa cobra pensioen den fase te yega na 65 aña.
“Esaki tabata necesario sino APFA lo a bati bancarota y Gobierno di Aruba lo no por a carga esaki.”
APFA ta un di e institucionnan mas grandi di Aruba. De Meza a splica cu decisionnan di pasado a causa cu APFA a cay den problema serio. P’esey asina cu AVP a drenta Gobierno a pone como prioridad pa drecha e situacion di e instituto aki. Awendia e grado di cobertura di APFA ta riba 100% y tin un situacion saludabel atrobe.
P’esey pa AVP ta incomprendibel con empleadonan den fin di siman ta haya carta cu SERLIMAR no a paga nan prima na APFA. Esaki ta hustamente decisionnan cu den pasado a causa cu APFA a haye den un problema serio.
“Aki bo ta hunga cu pensioen di trahadonan y esey hamas por tuma luga. Si bo situacion no a duna pa haci pago, mester a sinta na mesa cu APFA y trahadonan pa busca un solucion. No manera awo cu e carta a yega como un sorpresa pa e trahadonan cu ta haya nan cu un situacion hopi grave.”
Parlamentario de Meza a bisa cu nan lo bay haci diferente pregunta na Gobierno riba e situacion aki y no kier pa bay bek na e situacion prome cu 2009.
“Ta parce cu no tin placa pa paga e prima di e trahadonan, pero si SERLIMAR ta wordo hinca den tur sorto di debe, manera paga sponser manera huurmento di e edificio na Pos Chiquito cu a wordo para door di Gabinete Mike Eman II pasobra ya tabatin un otro contracto.
No tabatin necesidad pa haci uzo di e edificio na Pos Chiquito, pero como doñonan ta sponser di e partido a core firma un contracto nobo.
E operacion cu tin na Barcadera a wordo saca for di man di SERLIMAR y a pone den man di otro compania cu mester wordo paga por lo menos 6 miyon pa añacompania aki lo mester wordo paga pa aña por lo menos 6 miyon, cual ta placa cu por a wordo inverti den SERLIMAR mes, un trabou cu SERLIMAR mes por a haci pero cu awor ta wordo paga na otronan. Ta p’esey SERLIMAR no por a paga su primanan. Weganan politico cu ta algo iresponsabel cu APFA no ta participa den dje.”