E trabou aki ta un profesion bunita pasobra e ta brinda servicio na nos muchanan
Riba Dia Internacional di Maestro, Minister encarga cu Enseñansa, den nomber di Gobierno di Aruba, a felicita tur maestro. E trabou di maestro ta un profesion hopi bunita pasobra cada maestro ta na servicio di nos muchanan y ta traha pa nos futuro generacionnan. Sinembargo ta di lamenta cu hopi hende no ta realisa con pisa y importante e profesion aki ta.
“Mi ta gradici tur maestro pa nan trabou cu nan ta eherce bou di condicionnan hopi biaha adverso. Gobierno di Aruba ta reconoce cu no tin suficiente medionan financiero pa tin tur cos na ordo den klasnan”, Minister Lampe a bisa.
E mandatario a menciona algun condicionnan den klas cu ainda falta atencion den nos scolnan. Entre otro varios scol ainda no tin airco den klas haciendo e dificil pa duna les den temperaturanan halto. Apesar di esaki, nos maestronan ta sigui cu smaak haci e trabou noble aki.
Un otro reto cu enseñansa ta enfrentando actualmente ta e scarcedad di maestro. Esaki ta un problematica internacional. Gabinete Wever-Croes ta tumando diferente preparancionnan pa atende cu e scarcedad di maestro. Minister Lampe a enfetisa cu nos tin mester di tur nos maestronan cu nos tin caba como tambe nos tin mester di mas maestro.
“Cu esaki mi kier pa tur maestro sa cu Aruba tin mester di boso. Nos muchanan tin mester di boso. Gobierno di Aruba lo haci tur lo posibel pa boso por sigui traha cu hopi alegria y cu entusiasmo. No ta nos deseo pa nos maestronan cansa door di demasiado trabounan cu nan tin cu ta haci e peso mucho pisa pa nan”, Minister Lambe a enfatisa.
E titular di Enseñansa ta encurasha pa tur maestro acerk’e si tin cualkier sugerencia. E Minister a laga sa cu e ta cla pa scucha cada maestro cu tin cualkier pregunta, problema pero tambe iniciativa y ideanan cu nan tin pa mehora e calidad di enseñansa manera ta indica tambe den e meta 4 di e Metanan di Desaroyo Sostenibel di Nacionnan Uni. (SDG’s).
“Ban uni tur forsa pa realisa e meta aki di eleva e calidad di nos enseñansa”, tawata palabranan di Minister Armando Lampe.
