E di dos edicion di ‘Kids4Bites’ a tuma luga den e vakantie di october, dianan 1 pa 5. E biaha aki a toca turno di Oranjestad na Colegio Arubanol. Durante e siman aki muchanan di 8 pa 12 aña por a siña con pa traha nan mes un wega riba computer. Ademas di a duna e muchanan algo educativo pa haci durante vakantie, nan por a siña riba un manera basico con nan weganan faborito ta wordo traha. ‘Kids4Bites’ un biaha mas tawata un exito total.
Aruba merece di un Gobierno cu ta dinamico cu tin e capacidad pa enfrenta tur reto cu lo por bin den su caminda den futuro. Como un isla chikito nos ta rico den curashi y espirito di renobacion. Tur esaki ta tera fertil pa innovacion. Por medio di colaboracion y un maneho responsabel Futura Lab bou maneho innovativo Minister President, Evelyn-Wever Croes cu ta encarga cu innovacion tey pa duna su aporte na e crecemento sostenibel di nos isla y ekipa nos Gobierno, nos hendenan y nos futuro generacionnan cu e habilidadnan pa enfrenta e retonan di futuro. Innovacion ta cuminsa na nos muchanan. ‘Kids4Bites’ ta un guia pa nos muchanan logra e habilidadnan aki.
Minister di Enseñansa Armando Lampe a representa Prome Minister Evelyn-Wever Croes y a haci entrega di certificadonan na cada mucha cu a partipa na ‘Kids4Bites’.