Durante lansamento di e proyecto innovativo ‘Mobile Makerspace’ dialuna atardi na MFA Santa Cruz, Prome Minister Evelyn Wever-Croes a duna un discurso gradiciendo na prome luga e ekipo di Futura Lab.
Futura Lab ta e instituto di Gabinete Wever-Croes encarga pa ehecuta e plannan di innovacion di Gobierno di Aruba. Chief Innovation Officer, señora Varelie Croes ta lidera e ekipo di Futura kendenan ta trahando hopi duro pa trece innovacion den e futuro generacion.
Cu e pensamento cu educacion di nos muchanan ta e fundeshi pa futuro, Futura Lab ta intruduci ‘Mobile Makerspace’ cu ta un proyecto innovativo cu a wordo financia den colaboracion cu Union Europeo y Gabinete Wever-Croes.
“Desde e momento cu nos a drenta gobernacion, nos a ripara cu tin un gap grandi den e area di innovacion den gobierno y den nos sociedad. Tecnologia ta avansando na un nivel hopi rapido y e ta hunga un rol primordial den e futuro desaroyo di nos pais. Pa diversifica nos economia y nos sector laboral, inversion den innovacion no ta un opcion mas sino un necesidad. Nos muchanan lo bay traha trabounan cu ta rekeri habilidadnan nobo, trahando cu tecnologianan avansa y cu kizas no ta ni existi ainda.
E maneho di nos gobierno ta pa pone e ser humano central. P’esey e inversion den hisa e capacidad di innovacion di nos sociedad ta un prioridad halto. Esaki lo yuda nos sociedad, y en especial nos muchanan, nos futuro generacionnan, crea e conocemento cu nan tin mester pa nan por ta exitoso den futuro.
E ‘Mobile Makerspace’ ta un proyecto innovativo y sostenibel pa muchanan por bin den contacto cu tecnologianan nobo pa stimula locual ta conoci como e industrianan STEM (sciencia, tecnologia, ingenieria, y matematica). E bus aki cu den pasado tabata conoci como un Bibliobus, a wordo transforma den un ‘Mobile Makerspace’ ekipa cu e ultimo tecnologianan entre otro 3D printer, computer pa coding, Internet of Things, y Robotics.
Cuminsando e siman aki caba e bus lo cuminsa bishita diferente eventonan rond di nos isla. Entrante otro siman e programa oficial lo cuminsa y e bus lo bishita diferente scol durante e programa di traimerdia. Di e manera aki cuminsa prepara nos generacionnan nobo pa trabounan di futuro.
P’esey awe e ta un honor pa introduci na boso e Mo-B Lab. Un proyecto cu lo siña nos muchanan tecnologianan avansa y cu lo dunanan e oportunidad pa ta creativo y explora nan imaginacion, y asina desaroya nan ‘Habilidadnan di siglo 21’.
E proyecto aki no lo ta posibel sin sosten di Minister di Educacion, Minister Armando Lampe, Metabolic Foundation, Biblioteca Nacional, y e team di Futura. Un danki di curason ta bay na full e team di Metabolic Foundation miho conoci como Brenchie’s Lab, of B-Lab, cu a traha dia y anochi simannan largo pa por a transforma e bus aki den un bus cu lo ta un ehempel pa otro islanan den region.
Aruba su economia di futuro lo tin cu wordo carga door di un modelo nobo di crecemento balansa, catalisa pa innovacion y teniendo innovacion central den nos maneho. E Mo-B Lab ta un stap grandi den e direccion nobo pa Aruba di nos gobierno, poniendo e ser humano central. Esaki ta solamente e comienso”.
Prome Minister Evelyn Wever-Croes a encurasha tur presente pa explora tur loke Mo-B Lab, e makerspace, tin pa ofrece.
Gabinete Wever-Croes ta gradici tur organisacion cu a contribui na e realisacion di e Mobile Makerspace; na Christie Mettes y Tony Sevold y henter e ekipo di Brenchie’s Lab, Bibliotheca Nacional, y na e team di Futura.