Parlamentario Endy Croes ta reacciona riba bishita di Mike Eman na Kamer van Koophandel. Por a tuma nota cu Mike Eman esun mes mes cu a desgracia economia di Aruba redoblando e debe nacional di 41.7% pa 90% a haci un bishita na Kamer van Koophandel. Mike Eman sinonimo na e Profeta di mentira Hananias a cuminsa cu su rondanan di manipulacion. Manera cu el a sali di un reunion cu Kamer van Koophandel, el a haci un show dilanti e edificio di KVK. Tristo si pa mira cu netamente Mike Eman y AVP kendenan ta e culpabel mayor di e deterioro di pais Aruba creando e Mega Debe y e desaster financiero kier pretende awor di ta e salvador. Spaar Aruba di hendenan asina! Mesun AVP y Mike Eman a causa cu e aña aki Aruba mester paga 219 MIYON solamente na interes riba placanan presta. Mesun Mike Eman y AVP aki a fiesta 89 MIYON na propaganda pa amigonan di cas. Mesun Mike Eman y AVP a crea e desaster financiero malgastando 120 MIYON na deskundig advies pa amigonan. Mike Eman y AVP a regala amigonan di Phillips Lighting un contract di 5 MIYON florin net promer cu Mike a bay cas y e pueblo aki mester keda paga pa un compania cual te awe a cambia solamente 22 bombio riba Plaza Padu y net nada nada mas. Mike “ Hananias” Eman y AVP a percura pa Aruba cuminsa paga desde e aña aki 80 .7 MIYON pa aña pa 20 aña largo na proyectonan PPP. Mike Eman a percura pa compromete Aruba cu 1 BIYON florin den e proyecto “Bo Aruba” cual pronto nos lo bay tende mas di dje. Ta mesun Mike Eman aki a hisa prijs di awa y coriente cu 15% dia 1 di October 2014 momento cu nan a Hedge na un manera incomprendibel malgastando 300 MIYON di pais Aruba. Ta e mesun Mike Eman aki a grita den Parlamento cu e ta orguyoso di e debe y e debe t’ey pa nos tur bay pag’e den futuro. Awe bo kier cuminsa manipula pa yega bek na poder? Bo ta corda con bo a campaña cu bo lo elimina BBO? Na cuanto Mike Eman y AVP a laga e BBO? Na 3.5% toch? Bo ta kere cu pueblo por lubida? Bo ta kere cu bo por sigui manipula un pueblo inocente? Pais Aruba su desgracia tin un nomber y un fam: Mike Eman. Pues sigui bishita tur instancia pero mi ta sigur cu den profundidad di nan curason ora nan gaña hari cu bo nan sa bon bon cu bo no lo por bolbe nunca mas na poder. E speransa t’ey y den 2019 nos lo bay mira hopi cosnan positivo cu un economia creciente y floreciente. Poco pasenshi mas. Mike Eman y AVP ta 8 aña largo bo a masacra e pais aki. Nos no tin un toverstok pero si nos curason ta na e lugar corecto y pueblo ta compronde esaki.