Parlamentario Setty Christiaans-Yaragaray a trece dilanti con e, siguiendo e diferente rapportnan di Banco Central di Aruba, ta mira e situacion y desaroyo economico na Aruba. Esaki mas bien tambe pa contra aresta oponentenan politico cu kier pinta con malo, segun nan, e situacion economico na Aruba ta, sabiendo cu ta nan mes a hiba e desaroyo aki pa e ultimo añanan cu nan a goberna.
Gobierno, trendsetter di un pais
Economia di Aruba ta depende di diferente aspecto, por ehempel con pueblo y comercio ta gasta nan placa, cuanto placa turistanan ta laga atras na Aruba durante nan estadia, cuanto un gobierno ta gasta y inverti na Aruba, cuanto sector priva ta inverti na Aruba, cuanto ta wordo importa y alabes cuanto ta wordo exporta. Naturalmente un gobierno semper ta conoci pa ta un trendsetter di un pais, pues ta importante pa e mundo comercial sa ki direccion y maneho un gobierno kier hiba mirando cu esaki ta afecta comercio tambe. P’esey tambe e forma con comercio ta percibi situacion economico ta hopi importante pa e clima di inversion.
Na su turno Banco Central di Aruba (BCA) ta publica diferente rapport cu indicadornan economico, resultadonan di e situacion real y actual na Aruba pero tambe BCA ta presenta resultado di surveynan cu nan ta ehecuta, manera un Comsumer Confidence y e Business Perception. Pa BCA ta imporante e resultadonan aki pa asina nan por sigui pronostica desaroyo economico na Aruba, mirando cu te cu awor na Aruba nan ta e unico cu ta haci e pronostico aki, cu ta e GDP.
Gobierno anterior tabata soña lanta
Pues tumando e diferente resultadonan cu BCA ta emiti por wak kico ta wordo percibi, kico ta wordo premira pero sigur tambe kico ta wordo realisa concretamente na Aruba economicamente. E parlamentario no por comprende dicon e partido opositor, siendo e actor mas grandi cu a hiba Aruba den e situacion malo cu Aruba ta awe, ainda por kier pais Aruba asina malo door di specula cu Aruba su economia ta bay malo. Con malo bo por desea mas pa Aruba? Resultadonan recien di BCA ta ilustra hustamente cu cosnan a cambia na Aruba! E gobierno actual kier hiba un postura mas conservativo cu e gobierno anterior cu tawata soña lanta masha hopi mes, poniendo pueblo y mundo comercial kere den nan y despues no por concretisa nan soñonan. E gobierno actual ta mustra cu e kier tuma pasonan chikito y realistico hustamente no engaña of duna impresion eroneo di con economia ta bay crece. Logicamente esaki ta un cambio di mentalidad cu mundo comercial na Aruba ainda falta pa custuma cu ne y ta logico.
Prospectonan positivo
Den e tabel y imagen adhunto por nota algun resultado y comentario di BCA. Por nota con na aña 2017 tin un crecemento economico (GDP real) registra di 1.2%, mientras cu e 2 añanan anterior a registra caida di 0.1% den 2016 y caida di 0.4% den 2015. E informacion aki ta obtenibel den e “Statistical Tables – Real Sector Quarter two, 2018” di BCA. Tambe por nota den e publicacion “State of the Economy – First Quarter 2018” comentarionan manera “fiscal deficit of the government declined to 1% of GDP”, “Tourism sector performed well in the first quarter 2018”, “consumption indicators showed mixed results in the first three months of 2018” cual ta mas tanto cu Belastingdienst a mustra di tin mas entrada na BBO y importacion compara cu prome kwartaal di 2017. Tambe e ultimo rapport a duna un comentario “government finances improved slightly” mustrando aki un caida den e deficit pero tambe un stabilisacion porfin di e debe na e GDP cual ta ilustra tambe den e grafiek adhunto.
Por conclui e ora cu si acaso e publicacion di “Business Perception” no a mustra ful confiansa ainda di sector comercial na Aruba, por bisa cu e prospectonan den horizonte ta mustra di ta positivo y muestra cu un cambio den desaroyo y direccion ta visto!