Diahuebs atardi, Prome Minister Evelyn Wever-Croes a cera un convenio hopi importante pa Aruba. Esaki ta un convenio cu Columbia University pa dos ‘Capstone Innovation Projects’ cu ta cuminsa na januari venidero. Columbia University ta den e top 3 universidadnan na Merca.
E proyectonan aki ta encera dos grupo di 8 ‘master students’ cu lo haci nan investigacion di innovacion pa nan ‘afstudeeropdracht’ cu lo yuda nos. E prome proyecto ta ‘Innovation Economy’ y hunto cu Ministeri di Finansa y Economia a scoge pa innova e concepto di Freezone den algo mas innovativo. E di dos proyecto ta un investigacion con pa implementa miho e plan di ‘E-government’.
Prome Minister a duna di conoce cu esaki no tin costo envolvi, kiermeen cu Aruba no ta paga nada. E unico cos cu Aruba mester haci ta percura pa un bon guia y apoyo pa e studiantenan y esaki Gobierno di Aruba ta garantisa. Estudionan similar na esaki ta costa entre $200.000 pa $300.000.
Prome Minister: “Esaki ta un convenio solamente pa e dos Capstone Projects aki. Pero ken sa, talves e ta habri mas posibilidad pa nos studiantenan. Esaki ta keda den man di Minister di Enseñansa Armando Lampe. Mi ta trece e informacionnan di contacto necesario. Maske e profesornan cu mi a papia cu nan ta encarga solamente cu Capstone Projects, esaki por habri caminda pa mas posibilidadnan den futuro”.