Tur luna Dr. Horacio E. Oduber Hospital ta scoge su empleado di luna y e biaha aki esaki a resulta den nomber di Romeo Kilayko cu a bira empleado di luna di augustus. Ela wordo sorprendi cu un celebracion tradicional di sorpresa ora cu su coleganan di Center of Advanced Woundcare a pretende di reuni hunto cu e manager pa asina sorprende nan colega Romeo cu e nominacion bunita aki.
Romeo Kilayko tin 18 aña ta labora na hospital y despues di a traha como verpleegkundige a haya interes den specialisa pa traha cu heridanan. “No ta tur hende tin curason pa traha cu herida y ami a scoge p’e caminda ey”, el a expresa. Na momento cu el a specialisa, el a ricibi sosten di su hefenan y awo e ta un ‘Wound Specialist’, trahando di cerca cu specialista riba diferente piso y Center of Advanced Woundcare na Hospital.
Romeo ta un hende hopi servicial y amabel cu su pashentnan y ta dispuesto pa bay e ‘extra mile’ pa nan. Ademas, Romeo ta un colega profesional dunando contenido na su funcion unda cu e ta mantene un bon balansa den su trabao como ‘Wound Specialist’y otro actividadnan. E tambe ta duna guia na studiante y yuda organisa simposio. E tin amplio conocemento den su ramo di trabou y ta keda desaroya esaki. Tambe Romeo ta tuma iniciativa pa mehoracion riba piso y ta bin cu ideanan pa mehora e servicio y cuido na e pashent.
E ta traha hunto cu e management team y specialista, percurando semper pa e pashent keda central. Hunto cu su team y otro colega a ricibi varios training avansa cual a resulta cu awo Aruba tin un ‘Center of Advanced Wound Care’ cu ta e miho centro di herida den e region Caribe, di cual Romeo Kilayko ta masha orguyoso di dje. A logra pa crece hopi y hasta awo otro luganan den region ta mira Aruba como ‘benchmark’ di cuido di herida. Loke ta keda esencial den tur esaki ta un actitud positivo pa yuda pashentnan trata nan herida.
Tur su colega y e coordinador medico di Center of Advanced Wound Care, dr. Yuri Casseres ta contento cu Romeo a ricibi e distincion bunita aki. Director medico sr. Ezzard Cilié, Dr. Alex Ponson, ciruhano y Olga Rodriguez, clustermanager tabata tey presente na e celebracion pa felicita e empleado di luna di augustus di Hospital y a dese’e exito den su trabou y p’e sigui haci e bunita trabou cu e mesun pasion grandi ta ser aprecia pa tur na Hospital. Pabien Romeo cu e bunita reconocimento aki.