Tur a haya un Super Hero Card como regalo
ORANJESTAD, Aruba – 26 di September 2018: Diahuebs ultimo clientenan di Stichting voor Verstandelijk Gehandicapten Aruba (SVGA) tabata invitado special pa mira pelicula na The Cinema situa den Renaissance Marketplace. Pa mas cu 5 aña caba The Cinema ta partner cu SVGA, clientenan di scolnan Pasadia Bibito Pin, Scol Dununman, Cas Sjabururi, Pasadia Briyo di Solo y Centro Man Na Obra por mira pelicula gratis.
Dentro di poco MetaCorp lo celebra 100 aña di existencia y The Cinema a dicidi cu ta cambia e carchinan cu tabatin pa nan clientenan special. Ta bon pa enfatisa cu pelicula ta e prome e negoshi cu famia De Veer a inicia cune na aña 1920. Ta for di eynan e compania a crece y pasa pa refresco, transporte, hotel, cerbes, coleccion di sushi, reciclahe, laundry comercial y asina lo por sigui menciona. Pesey mes, den cuadro di celebracion di 100 aña di e compania netamente Arubiano aki, ta importante pa para un rato keto for di unda tur cos a cuminsa, esta e negoshi di pelicula. E industria a pasa den hopi reto, for di television cu a bira color, despues huurmento di video cu a bin na moda y awendia cu Netflix, toch te ainda e industria aki ta sigui desaroya.
The Cinema como tal tampoco ta para cu su mannan crusa. E compania ta pasando dor di un momento di adaptacion y innovacion. Temporalmente lo opera for di Renaissance Marketplace so, pa despues crece den un edificio nobo, cu e tecnologia mas moderno den Caribe.
Pa loke ta clientenan di SVGA mes, e carchi nobo a trece beneficionan nobo tambe. Diahuebs atardi a haci entrega oficial di e carchinan, e Super Hero Cards. Clientenan di SVGA awor a haya carchi nobo cu tin nan nomber y potret pa mira pelicula tur dia si nan kier. Loke a bin nobo ta cu e clientenan special aki por bay mira pelicula na The Cinema cu un persona extra, e persona ta haya ticket na mita prijs.
Devin de Veer, Sales & Marketing Coordinator di The Cinema, a splica cu a traha pa tres siman largo riba e Super Hero Card pa tur e 450 clientenan di SVGA. Mas di 300 cliente feliz di SVGA a presenta na The Cinema pa disfruta di un pelicula siman pasa. E ehecutiva di The Cinema a mira con feliz e clientenan tabata despues cu nan a ricibi nan Super Hero Card cu tin nan potret riba dje. Desde oranan trempan e clientenan di SVGA a cuminsa yega The Cinema contento, pasobra nan tin algo cu ta pertenece na nan.
The Cinema ta gradici tur esunnan cu a haci e proyecto aki posibel, incluyendo e fundacion SVGA y tur nan lidernan. Sin e leidsternan e Stichting no lo por draai y ta gradici nan p’e sosten cu nan ta brinda e clientenan y specialmente na Elvira y Angelique. Ta gradici gerencia di MetaCorp cu ta sostene e proyecto, departamento di IT cu a traha pa 3 siman largo riba e carchinan y e team di The Cinema.
“Danki na nan cu awe nos ta cla cu e proyecto y haci’e un realidad”, asina Devin de Veer a finalisa bisando.