Boegoeroei – Dialuna mainta algo prome cu 8’or y mey polis a bay cu urgencia un cas na Boegoeroei, caminda cu un dama lo a bira hopi malo, a haya banda di e dama tawata tin un pochi pildo y den e cas tawata mustra, cu lo por tawata tin un pelea of un discussion cu lo por a bay for di man.
Na yegada agentenan ta topa cu un dokter na e cas y ta confirma cu enberdad e dama su situacion ta serio y cu e mester di ambulance cu urgencia.
Na e sitio, e agentenan atento a constata cu lo mester tawata tin un posibel bringamento den e cas. Esey lo tawata visibel y a haci e caso aki bira sospechoso.
E agentenan na e sitio mesora a notifica demas departamentonan. Den algun minuut por a mira presencia di recherchenan di Noord, cu a yega pa sigui averigua kiko exactamente a sosode.
Tambe Departamento tecnico di polis a presenta pa haci mas investigacion.
No por bisa kiko exactamente a pasa y con e potchi pildo a yega banda di e dama y si ta e pildonan ela bebe of ta trata di algo otro, pa e motibo ey a pidi pa recherche, pa descarta cu si lo por tin algo di haber cu un crimen.
E dama mes ambulance a transport’e cu urgencia pa hospital.