Na 2014 Gabinete Eman II, lidera pa Mike Eman a haya un KB pa motibo di mal maneho financiero unda cu e presupuesto tabata conoce un deficit di 9.3 % (- 465 miyon) y nos no por a sigui e rumbo financiero ey mas. Nos por corda e circo cu tabatin unda cu sr. Mike Eman kier a muri den un welga di hamber pero na momento cu ordo di ariba a bin pa plama for di otro, sr. Mike Eman a bula lanta, desarma tent su mes y core bay. Na 2 di mei 2015 sr. Mike Eman a firma un protocol unda e ta mina nos autonomia financiero door di permiti via un Landsverordening pa bin cu un colegio di supervision financiero. Y 27 augustus 2015 e ley a bira un realidad ora parlamentarionan di AVP a permiti esaki cu forsa retroactivo te 1 di augustus 2015.
Speransa di LAFT pa Pueblo
Despues cu pueblo a ser maltrata riba ordo di ex Minister Arthur Dowers y Mike Eman y unda hendenan cu a sali defende nos autonomia a hayanan den man di husticia, pueblo a resigna cu e speransa cu Hulanda via e ley di LAFT tin control riba sr. Mike Eman cu tabata y ta ainda un adicto na placa y tambe un manipulador y gañado.
Pero kico a resulta
Na november 2017 Aruba a conoce un gobierno nobo forma pa tres partido politico: MEP, POR y RED. Na momento cu a drenta, a topa e realidad cu nos presupuesto 2017 tabata uno ficticio y unda cu no a cumpli cu e norma di 0.5% stipula den e LAFT unda cu mester por tin un deficit (-25 miyon). Nos a topa cu un deficit financiero di 155 miyon (-3.1%). Pa locual ta trata presupuesto 2018 cu no a ser entrega y no tabatin intencion di entrega esaki y na final di dia esaki tabatin un deficit di 275 miyon (-5.5%), na unda den e ley di LAFT mester tabatin un surplus di 25 miyon (25 miyon). E gobierno nobo a tuma responsabilidad di e gobierno di Mike Eman y sigur di ex Prome Minister Mike Eman cu a tuma su retiro mesun anochi di eleccion y te dia di awe ta un cobarde cu ta sconde y no kier bin den parlamento pa responsabilisa su mes pa su maneho deficiente, unda cu a opta pa sigui fia y gasta y cu no a logra cumpli cu e mesun ley di LAFt cu el a percura hunto cu su parlamentarionan pa implementa na 2015.
E gobierno nobo a haye y te ainda ta haye cu momentonan dificil pa goberna un pais unda cu no solamente tabatin un deficit di 275 miyon cu Hulanda no a aproba y unda cu despues di hopi bay y bin a logra convence Hulanda cu e gobierno aki si lo tuma pasonan pero sigur lo percura pa sanea e situacion financiero di e pais aki. Mester a reduci e deficit di 2018 na 130 miyon florin, unda cu mester a haci tur ehercicio pa por a cumpli cu esaki y alaves mester a bin cu aumento di impuesto indirecto pa por cumpli cu entre otro e 80.7 miyon anual cu mester paga pa e proyectonan PPP y unda tambe ta inclui e 147.000 florin cu a bay na e fiesta di cumpleaños di Mike Eman dia 1 di september 2017.
Presupuesto 2019
Presupuesto 2019 a ser entrega cu un par di dia di retraso (1 di september), pero asina mes nos ta contento debi cu esaki a ser entrega den termino respetabel y sigur ta haci cu na momento cu e caba di cana su caminda legal nos tin suficiente dia pa trata esaki intensivamente den parlamento. Pero locual ta alentador ta cu den menos di un aña di e gobernacion aki y unda cu parlamento a pone bon cla cu pa 2019 nos kier wak un deficit di 0.5%, pues di 25 miyon pa 2019. Y e presupuesto 2019 cu a ser entrega a cumpli cu e norma aki tambe y por a scucha nos Promer Minister y tambe nos Minister di Economia y Finansas Xiomara Ruiz-Maduro cu nan ta optimista cu ya pa otro aña nos lo conoce un surplus di 0.5%, esta un surplus di 25 miyon y unda cu nan si ta lucha pa por logra baha e debe di Aruba cu ta actualmente 90% di nos GDP (pues di cada florin 90 cen ta bay pa paga debe) y sigur e gobierno ta optimista cu haciendo esaki nan por logra reduci nos debe nacional mas pronto cu ta posibel pa garantisa futuro di nos hobennan cu a keda den scuridad cu gobernacion di Mike Eman. Pues e proyeccion di Hulanda ta cu pa 2027 nos debe lo por yega 70 % di nos GDP y pa 2039 nos lo yega na 50% di nos GDP na debe, y ainda leu di locual cu gobierno di MEP a lagu’e na 2009, esta na 43%.
Pueblo mester ta orguyoso cu e gobierno aki ta cumpli cu pueblo door di drecha nos situacion financiero, p’asina nos por garantisa un futuro pa nos hobennan y sigur e no ta bai facil pasobra e ta exigi disciplina, hopi sacrificio y curashi pa tuma cierto decision impopular cu kizas pueblo lo tarda pa comprende manera tabata e caso di e 8.2% di fondo di solidaridad unda cu esaki tabata e base pa desaroyo di Aruba despues di Status Aparte.
Pa termina nos di parlamento tin di keda haci nos trabao pa por garantisa cu mal uso di fondonan publico no por pasa mas, y sigur percura pa mal maneho financiero manera esun di Gabinete Mike Eman I y II no mag pasa mas, nunca mas.