Den ultimo dianan, nos a tuma nota cu Partido AVP no ta mucho contento cu e maneho di Gobierno di Aruba di no hisa prijs di awa y coriente. Ex-Minister Mike de Meza ta cana despespera tur dia instruyendo su siguidornan pa exigi Gobierno di Aruba pa hisa prijs di awa y coriente. Nunca antes den oposicion tawatin tanto deseo asina di opositornan pa un Gobierno hisa awa y coriente pa e pueblo. E pregunta na Mike de Meza ta: “Kico pueblo a haci bo cu bo ta insisti pa Gobierno hisa prijs di awa y coriente”?
Pero, nos por corda si cu esaki semper tawata e deseo y maneho di Partido AVP sea nan ta den oposicion of nan ta gobernando. Pueblo no mester lubida e fecha di prome di october 2014, na unda cu e Gobierno di AVP a hisa prijs di awa y coriente cu 15% den un solo biaha. E dolor cu esaki a causa pueblo a termina den un manifestacion contra Gobierno di AVP. Sinembargo, e Gobierno di AVP no a para pa e dolor di pueblo y a manda cacho y riot commando riba e manifestantenan. Te hasta a golpia hende muher y hobennan.
Y toch, e Gobierno di AVP no a hala atras, y a sigui cu su plan pa hisa prijs di awa y coriente.
Mientras cu Mike Eman a fiesta cu placa di dividend di nos compania estatal pa organisa Green Conferences y tambe a biaha tur parti di mundo pa Green conferences cu e vision pa haci Aruba Green. E unico ‘green’ di Partido AVP ta nan color politico berde y nan maneho inmadura lagando atras un situacion financiero erormemente malo.
Prome Minister Evelyn Wever-Croes den mas di un ocacion a bisa cu lo no hisa e prijs di awa y coriente y a instrui e companianan di utilidad pa baha gastonan den nan departamentonan despues acudi na Gobierno. Gobierno di Aruba ta goberna drechi y no ta pone atencion na ningun exigencia maligno di Partido AVP y Mike de Meza.