Dia 7 di september ultimo, Archivo Nacional Aruba (ANA) a ribici un artefacto historico di famia Ecury. E artefacto historico aki ta un “gong” di koper. Un “gong”, na Spaño yama “gongo” ta piesa den forma di un disco di brons of koper. Esaki ta wordo colga generalmente na algo y ta haci un sonido ora di dale cu un pida palo. E “gong” ta un piesa di origen oriental/asiatico.
E “gong” aki tabata colga antes na e cas di famia Ecury situa na Schelpstraat 42, cas di famia Sr. Dundun Ecury y Sra. Anna Paulina Ecury-Ernst, mayornan di “Boy” Ecury.
E “gong” di koper aki ta den forma di un cabes di cabay. E “gong” aki tabata wordo uza pa yama e famia hunto, p.e. ora cu cuminda ta cla.
Na e cas aki Sr. S.J.A. “Boy” Ecury a nace y biba durante e añanan prome cu el a bay Hulanda pa su estudio. Ta dor di su permanencia na Hulanda den tempo di Segunda Guera Mundial, el a participa den e movemento di resistencia durante e Segunda Guera Mundial den añanan 40, di siglo pasa.
E “gong” di koper aki a wordo entrega na Archivo Nacional Aruba dor di Sr. Boy Ecury, kende ta yui di Sr. Nicky Ecury y ta subrino subrino di S.J.A. “Boy” Ecury.
Sr. Nicky Ecury tabata hunto cu su ruman Sr. S.J.A. “Boy” Ecury na Hulanda pa su estudio y durante tempo di guera Nicky tabata miembro di e “Limburgse Stoottroep”, cu tambe tabata un acto di resistencia contra e ocupacion di Hulanda.
Actualmente e cas den Schelpstraat ta wordo considera un monumento y ta wordo maneha pa gobierno di Aruba desde aña 1997. Desde aña 2007 e Museo Archeologico di Aruba ta situa den e edificio.
E “gong” lo wordo warda na ANA, caminda cu e lo wordo preserva y lo wordo haci accesibel pa esnan cu ta haci investigacion tocante topiconan relata na e artefacto, y pa uso pa publicacion y exposicion.
Archivo Nacional Aruba