Exitoso accion di limpiesa di Serlimar
Durante e ultimo reunion publico caminda cu Parlamento a yama gobierno pa bin duna cuenta di su maneho durante e prome 6 luna di gobernacion, Parlamentario Howell a haci Minister Otmar Oduber varios pregunta. Un di nan tabata kico ta e motibo cardinal cu e proyecto conoci como “Milieustraat” di Serlimar no a sigui y ki dia lo cuminsa bek cu ne, ya cu ta trata di un proyecto na bienestar di nos medio ambiente, di embeyecimento di nos isla y mantene nos isla limpi y for di aña pasa no a sigui mas cu ne.
Parlamentario Howell a indica cu e proyecto aki ta uno positivo. Durante Milieustraat den e bario ta duna e habitantenan di e bario en cuestion e oportunidad pa deshaci gratis di nan desperdicio, por ehempel, un frigidaire, stoof, cashi, sushinan di cura etc etc. cu normalmente lo mester a huur un container pa tira esakinan afo of mester busca un pick up cu kisas hopi no tin. Serlimar ta brinda e servicio aki cu e meta cardinal pa un medio ambiente saludabel y un Aruba limpi. Den pasado tur milieustraat tabata exitoso.
Alan Howell ta contento cu e mandatario tabatin oido pa su peticion y asina diabierna ultimo 14 di september 2018 a combina e Milieustraat hunto cu World Clean Up Day. Esaki a tuma den e bario di Santa Cruz y pronto e Milieustraat lo sigui den otro barionan. Parlamentario di POR ta manda un pabien grandi na Serlimar unda un biaha mas a demonstra pakico su existencia ta importante pa nos pais Aruba.
E accion aki a resulta un exito total, unda a yena un total di 11 container di 30 yarda cu desperdicio. Howell ta felicita e teaman di Serlimar, City Inspector, Infra Team, Ministerio di Medio Ambiente y tur otro instancia cu a contribui cu e tremendo proyecto aki y ta keda en espera di e anuncio di cual lo ta e siguiente bario.
“Un Aruba sin sushi ta un Aruba dushi”.