Teniendo cuenta cu constantemente ta sali informacionnan incorecto tocante prijs di awa y coriente, y e cantidad di preguntanan cu Gobierno ta haya si e prijs lo subi of no, Prome Minister Evelyn Wever-Croes a informa cu esaki no ta e caso.
Informacionnan cu Prome Minister a ricibi ta cu esfuersonan cu a wordo haci te cu awo, a conduci cu prijs di awa y coriente no mester subi. Esaki ta contrario na e speculacionnan in informacionnan incorecto cu tawata bayendo rond ultimamente.
Esaki ta contrario tambe na e prijs di crudo cu ta fluctuando bastante y bayendo den e direccion di aumento. Tambe e gastonan improvisto cu tawatin pa e situacion di huma na Astec lo por a influencia prijs di awa y coriente. Sinembargo a conclui cu e prijsnan no mester subi.
Prome Minister a duna di conoce cu pa e siguiente lunanan nos dilanti, e situacion segun calculacionnan ta bou di control por lo tanto no mester aumenta e tarifanan.
“Mi ta spera cu esaki lo trece tambe e trankilidad den comunidad. Esaki no ta facil y ainda no a caba di atende cu e problema. Gobierno no por garantisa cu prijsnan nunca mas lo subi y ainda no por indica exactamente ki dia e lo baha. Gobierno tin e responsabilidad di atende cu cada reto manera nan presenta. Pero pa e siguiente lunanan, nos lo no tin e preocupacion si e prijs lo subi. Gabinete Wever-Croes lo sigui lucha pa yega na e momento na unda lo baha e prijs di awa y coriente considerablemente”, Prome Minister a duna di conoce.