Parlamentario Endy Croes no a para keto y a sigui haci su trabao mandando diferente carta investigando e fiesta di Mike Eman cu placa di pueblo. No ta mucho tempo atras a “STOP” ATA di sponsor e auto di careda di ruman di Mike Eman. Realidad ta cu ATA a sponsor Team Aruba cu 1.6 MIYON florin y na momento cu nan tabata a punto di duna un otro 800 mil florin den 2018 esaki a wordo para net na tempo.
Parlamentario Croes su lucha ta lo siguiente. Nada personal pero si no tin placa pa drecha Palo Marga, no por tin pa un solo famia. Lotto pa Deporte ta secuestra pa un grupo di hendenan sin escrupulo amigonan di Mike Eman. Pues di eynan mannan ta mara pa yuda deporte. Awor Mike Eman no por kere cu e por sigui ordena companianan estatal pa sponsor su ruman. Den tur esaki Parlamentario Croes a sigui cana su caminda investigando y “Bingo”.
Den AAA tambe Mike Eman a percura pa ranca 225 mil florin pa e mesun auto di careda aki di cual 50 mil a wordo paga e aña aki esta den 2018. Endy Croes lo manda puntra e Minister encarga si esaki ta carga su aprobacion. Imposibel cu Palo Marga ta sclamando pa ayudo y por ehempel fin di e siman aki caredanan Internacional “One Cool Summer” lo ta coriendo cu Light Tower enbes di luznan normal unda mas di 200 bishitante di Corsou ta na Aruba cu cantidad di auto anto ruman di Mike Eman ta bolbe aranca 50 mil florin den 2018 for di un compania estatal.
Parlamentario Croes lo manda un di dos carta pa asina por conclui si ta Director representante di Schiphol group Sr. James Fazio ta autorisa pa aproba e suma aki of ta e “Board” a aproba esaki y kier splicacion alrespecto. AAA ta bon bon na altura di e cuestion cu ATA y mester por ta hopi mas cauteloso tumando decisionnan asina. Kico ta beneficio pa AAA? Pues lo busca pa yega na e berdad y corigi e maneho aki, Croes ta termina bisando.
Tur cu kier sigui e maneho y vision di gobierno ta bon bini pero esnan cu lo kier haci lo contrario lo mester saca nan conclusion. Gobierno no tin dos vision pero ta un solo vision tin y laga esaki ta hopi cla pa tur e companianan estatal, Croes ta termina bisando.