Desde 12 di augustus Centro di Bario Brazil ta di fiesta y den celebracion. Dianan 18 di augustus y 25 di augustus 2018 a tuma lugar diferente eleccion cultural caminda a keda eligi nos Baby, Chikitin, Prenda, Damita, Dama, Gran Dama y Dama Grandi Cultural. Dos anochi yena di cultura y folklore, caminda den tur presentacion a resalta e amor pa nos dushi Papiamento y e uzo di dicho y proverbio. Tambe hopi atencion a keda duna na nos custumber y tradicionnan, sin laga afor nos musica y bistimento tradicional. Tremendo actividad cu aña pa aña ta sigui crece.
Mi ta contento di por a aporta na un di e eleccionnan y sigur ta gradici pa e invitacion ricibi. Desde cu Centro di Bario Brazil a inicia cu e actividad aki semper mi a acudi y hunto cu mi famia a duna nos sosten.
Amor pa mi cultura ta algo cu di cas nos a lanta cu ne y sigur manera sr. Vicente Ras ta bisa “Gusta di otro, cuida y stima loke ta di nos!”.
Mi ta convenci cu actividadnan asina ta aporta grandemente na nos herencia cultural y mas cu tur cos ta un manera pa traspasa esaki pa e generacionnan nobo. Durante un anochi asina bo ta mira trahenan tradicional y nos bailenan folklorico keda presenta. Bo ta scucha di nos historia, custumber y tradicion y mas cu claro bo orea ta haya caricia di nos musica crioyo.
Mi kier a haci uso di e oportunidad pa felicita Directiva di Centro di Bario Brazil, comision organisador, tur voluntario cu mi sa a y lo traha masha duro mes, tur e candidatanan cu a participa, e gruponan di baile y mas cu claro na e publico grandi cu e asisti na e actividadnan aki.
Por ultimo mi kier a invita pueblo completo pa e 3 ultimo actividadnan cu lo bay tin relaciona cu celebracion di Dia di Brazil, esta awe diabierna dia 31 di augustus lo tin e famoso Parada di Lanterna cu lo cuminsa pa 7:00 pm, diasabra lo tin anochi riba parkeerplaats tocamento di Rincon Boys, Brisa Tropical y Stimami cu tambe ta cuminsa 7:00 pm y diadomingo lo tin actividad di 9:30 di mainta en adelante cu mercado crioyo y picnic cu ambiente di musica tipico y e gran parada folklore cultural cu ta cuminsa pa 3:00 pm.