Un plataforma di innovacion unico den region
Minister President Evelyn Wever-Croes ta ancuncia e lansamento di Futura Lab. Futura Lab, ta un lab di innovacion di Gobierno di Aruba cu e meta pa forma e brug entre e sector priva y e sector publico, p’asina crea un ambiente cu ta stimula capacidad innovativo y intelectual di nos pais. Futura lo ta encarga cu ehecuta e plan di innovacion di Gobierno pa desaroya un futuro di Aruba ancra den innovacion cu e ser humano central. E ultimo lunanan Futura Lab a lansa diferente proyecto y iniciativa riba e area di innovacion. Diferente workshop y reunionnan cu varios departamento di Gobierno y sector priva a wordo teni pa trece un dialogo habri pa determina kico ta e necesidadnan mas grandi cu tin riba nos isla. Entre otro, den luna di juni a organisa e ‘Innovation Summit’ unda sector publico, priva, civico, academico y nos comunidad a bini hunto pa discuti varios tema di prioridad pa nos pais.
Desde cu Gabinete Wever-Croes a asumi e rol di maneho di Aruba, a constata un gap grandi den e area di innovacion den Gobierno mes y den maneho. Esaki a ocasiona cu nos economia a keda stagna y cu crecemento a keda riba un nivel abou compara cu otro islanan den region. Nos mundo ta cambiando hopi lihe. Tecnologia lo hunga un rol grandi den futuro desaroyo di nos pais. Esaki ta trece hopi incertitumbre. Nos muchanan lo traha trabounan cu no ta exisiti ainda y nos sector laboral lo tin mester di habilidanan nobo. Tur e aspectonan aki ta trece un presion inmenso riba nos sector turistico cu mester carga nos economia.
P’esey e unico manera pa Aruba por sigui crece y progresa ta pa innova y crea un manera nobo pa stimula nos crecemento socio-economico. Desde december 2017, cu Gobierno di Aruba a nombra un Chief Innovation Officer, Varelie Croes, cu ta encarga cu e tarea di innovacion, Gobierno a indica su compromiso pa ta un Gobierno innovativo. Awe Gobierno ta anuncia un plataforma nobo Futura Lab cu lo ta encarga cu diferente aspecto di innovacion riba nivel gubernamental. Futura Lab ta forma parti di diferente ‘think-tanks’ y comisionnan pa sigui stimula e capacidad innovativo y crecemento sostenibel di nos isla.
Un di e prioridadnan mas grandi ta pa transforma Gobierno den uno digital, y haci eGovernment un realidad. Digitalisacion di Gobierno, aki por pensa riba un ID digital, pago online, servicionan di Gobierno online, modernisacion di nos leynan, entre otro. Tambe nos lo inverti den transformacion digital di nos servicio di impuesto. Pa por haci e vision aki un realidad a cuminsa inventarisa tur e sistemanan tecnologico di e departamentonan di Gobierno. Por medio di e evualacion di e sistemanan aki Gobierno lo crea un ‘roadmap’ pa por desaroya un plataforma nobo cu lo haci servicionan di Gobierno mas eficiente, cu lo yuda baha gasto, y tambe duna un miho servicio na ciudadanonan.
PROYECTONAN FUTURA LAB
-Mobile Makerspace
Un di e proyectonan cu ta den desaroyo den colaboracion cu Biblioteca Nacional y Metabolic Foundation (Brenchie’s Lab) ta e Mobile Makerspace.
Mobile Makerspace ta un proyecto innovativo y sostenibel, y ta encera un bus, ekipa cu e ultimo tecnologianan entre otro 3D printers, computers pa coding, Internet-of-Things, y robotics. E proyecto aki lo inicia den e siguiente lunanan y lo cuminsa bishita diferente scolnan na nos isla. Ademas di e Mobile Makerspace, Futura Lab conhuntamente cu Biblioteca Nacional lo yuda pone e Bibliobus bek riba caya pa cuminsa bishita nos scolnan bek. Futura Lab ta trahando hopi serca cu Brenchie’s Lab y Bibloteca Nacional pa crea un MakerSpace na bibloteca na Oranjestad unda cu muchanan lo por participa den difirente programa tecnologico.
-Kids4Bytes
Mas recien a organisa un ‘coding camp’ ‘Kids4Bytes’. Durante e camp aki muchanan di 7 pa 13 aña por a siña con pa traha nan mes un wega riba computer. Ademas di duna e muchanan algo educativo pa haci durante vakantie, nan por siña riba un manera basico con nan weganan faborito ta wordo traha.
-Innovacion Social pa Juventud
Ademas di tur e iniciativanan aki Futura Lab ta brinda nan apoyo na diferente organisacionnan civico cu tey pa stimula e capacidad intelectual y social innovativo di nos jovennan. Un paar di e proyecto ta ‘E Bos p’E Cambio’ y Aruba Youth Impact Café.
Aruba merece di un Gobierno cu ta dinamico cu tin e capacidad pa enfrenta tur reto cu lo por bin den su caminda den futuro. Como un isla chikito nos ta rico den curashi y espirito di renobacion. Tur esaki ta tera fertil pa innovacion. Por medio di colaboracion y un maneho responsabel Futura Lab bou maneho innovativo Minister President, Evelyn-Wever Croes cu ta encarga cu innovacion tey pa duna su aporte na e crecemento sostenibel di nos isla y ekipa nos Gobierno, nos hendenan y nos futuro generacionnan cu e habilidadnan pa enfrenta e retonan di futuro.
Pa mas informacion bishita e Facebook page Aruba Futura of website www.futuralab.org.