Oranjestad: Den oranan di mainta un adicto ambulante a asalta un commerciante Venezolano, esaki a sosode dilanti di e frutería Frangie, patras di Corte di Husticia.
E adicto ambulante a bay cu su tas, den dje tabata tin un saco di placa cu mas o menos 5 mil dollar cu e commerciante a caba di colecta, e commerciante ta atende cu dos barco di fruta. Den e tas tabata tin su paspoort y demas pertenencianan importante.
Den oranan di atardi e comerciante lo a haya e informacion cu e adicto ambulante ta banda di ex Hotel Central. Mesora a pidi pa presencia di polis.
Na yegada polis ta papia cu e victima y un rato despues nan ta topa cu e adicto ambulante Elton na e chollerhouse di 4 piso net pabou di ex Hotel Centraal. E tabata tin e saco di placa di e comerciante den su poder, aparentemente e adicto aki ta esun cu lo a asalta e comerciante den oranan di mainta. No ta conoci si e placa den e saco tabata completo. E tas cu e paspoort y demas pertenencianan di e comerciante no a wordo haya.
E adicto a wordo deteni y transporta pa warda di polis.
Polisnan a sigui busca den e chollerhouse, pero sin resultado.
E commerciante su preocupacion ta su paspoort, cu actualmente ta hopi dificil pa e por haya un nobo, e commerciante ta biba na Maracaibo y lo mester bay Caracas y papia cu e minister concerni pa mira si e por logra haya un y con liher e lo por haye ta keda un pregunta.