SAVANETA – E di dos edicion di ‘Bariofest’, organisa pa e team dinamico di Special Proyects, cu ta forma parti di e proyecto ‘Ban Cultiva’, a tuma lugar diadomingo ultimo den pleno curason di Savaneta, unda a duna reconocemento na algun baluarte di Savaneta. E Bariofest a inicia for di mainta, unda cu e tentnan cu diferente articulo, informacion y cuminda tabata hopi bon bishita y entretenimento sin fin tanto pa e chikitonan como e grandinan. Parlamentario Sue-Ann Ras (MEP), como digno representante pa su districto Savaneta, tabata presente y a experiencia e bunita momento aki di cerca.
E BALUARTENAN RECONOCI
E baluartenan cu a haya nan reconocemento ta: Roly Bislik Donald Christiaans, dr. June Tromp, Ronny Kock, Chastity Kock- Hodge, Chindo Colina, Cesar Olarte, Dufi Kock, Ana Leonor Kock (q.e.p.d.) y Haime Angela (q.e.p.d.). Cada un ta un lider y rol model den nan area y a sa di cultiva y promove na otro, loke nan ta pasiona y dedica na dje pa hopi aña. Segun Ras, esaki sigur ta un gran estimulo y demostracion di aprecio pa tur loke cada un di e baluartenan a nifica p’e districto di Savaneta, como tambe e mucha-, hoben- y adultonan cu nan a y ta influencia cu nan tremendo trabou. “Por consider’e como un acto social, ya cu ta depende di e boluntad di e personanan y esey ta un indicador di solidaridad y cultura sano pa un comunidad”, Ras a bisa. E ta spera cu por tin mas di e tipo di eventonan asina, unda cu e baluartenan di nan districto por keda reconoci pa nan excelente labornan desplega den comunidad y mas importante, den nan respectivo bario of districto.
Un palabra di pabien ta bay na Minister Glenbert Croes y e team dinamico di Special Proyects , pa tuma e iniciativa aki y brinda honor y aprecio na nos hendenan.