ORANJESTAD, Aruba – E prome 6 lunanan di 2018 tabata positivo pa locual ta trata turismo di nos pais. Te cu luna di Juni 2018 Aruba a yama bon bini na un total di 540.377 turista “stay-over” cu ta nifica un crecemento 2.6% compara cu e prome 6 lunanan di e aña anterior. Por mira crecemento den bishitante nan procedente di Merca, Brazil, Canada y Hulanda. Pa locual ta trata e luna di juni 2018 por mira un crecemento di 7.7% den cantidad di bishitante stay-over pa Aruba cu ta un total di 91.877 bishitante, pues 6.589 bishitante mas cu e mesun luna na aña 2017.
Turismo “stay-over”
En comparacion cu 2017 pa locual ta trata turismo “stay-over” nos por wak cu e cantidad di bishitante nan procedente di Norte America den luna di juni a subi cu 12% cual ta un total di 7.130 turista mas cu na 2017. Pa juni 2018 por wak un aumento di 11.8% pa locual ta trata turismo for di Merca. Pa Canada tin un cremento di 17.8% compara cu juni di e aña anterior. Norte America a trece 413.633 turista total pa Aruba den e prome 6 luna nan di 2018 cual ta un aumento di 8.0% compara cu e prome 6 lunanan di aña 2017.
Pa Sur America por wak cu Aruba a ricibi un total di 15.302 bishitante den luna di juni, pues un caida di 4.3% compara cu 2017. Venezuela ta sigui representa e caida mas drastico den cantidad di bishitante di Sur America cu un caida di 32%. Colombia ta crece cu 16.2%. Sur America a trece 16.7% di e total di turismo pa juni 2018. Pa e prome 6 lunanan di 2018 Sur America ta trece 70.751 bishitante pa Aruba cu ta 19.6% menos compara cu 2017.
Bishitantenan procedente di Europa pa juni 2018 ta baha cu 6.8% compara cu 2017. Reinonan Uni a baha cu 47.9%, esaki ta debi na e asina yama BREXIT. E caida di e mercado di Reinonan Uni ta wordo compensa cu crecemento for di otro paisnan. Pa Hulanda por wak un aumento di 18.2%. Pa Alemania tin un aumento di 7.7%. E continente Europeo a representa 6.9% di turismo pa Aruba pa luna di juni. Pa e prome 6 lunanan di 2018, Europa a trece 38.731 turista pa Aruba, cu ta 2.7% menos na 2017.
Turismo crusero
Den e prome 6 lunanan di 2018 Aruba a yama bon bini na 437.245 pasahero crusero. Esaki ta 2.108 pasahero mas cu e aña anterior, pues un crecemento di 0.5% compara cu 2017.
Hotel
Segun Aruba Hotel and Tourism Association pa luna di juni 2018, e ‘Average Daily Rate’ (ADR) a aumenta cu 16.8% compara cu juni 2017 di USD 200.80 na 2017 pa USD 234.47 na 2018. E entrada pa camber disponibel (RevPAR) a aumenta cu 17% di USD 165.91 na juni 2017 pa USD 194.06 na juni 2018. E anochinan ocupa (ORN) pa camber a aumenta cu 0.6% den juni 2018.
Economia.
Tur indicador a demostra di ta positivo pa e prome 6 lunanan di 2018. Turismo ta sigui contribui na economia di Aruba. Turistanan di calidad ta yegando Aruba y esaki ta cuadra cu e vision di Minister di Turismo.