Diabierna 6 juli, Conseho di Minister di Reino a aproba e nombracion di nos miembro nobo di Colegio di Supervision Financiero, CAFT pa Aruba entrante 1 di augustus 2018. Señora Helen van der Wal no ta un persona desconoci pa Aruba. Pa hopi aña señora van der Wal a sirbi nos pais den diferente puestonan importante y actualmente e ta secretaris di Raad van Advies.
Señora Van der Wal tin un historia amplio den e aparato gubernamental di Aruba entre otro den nos cuerpo policial. Desde 2004 señora Van der Wal ta traha y ta Secretaria di Raad van Advies. Su conocemento amplio di e situacion financiero y prosesonan di presupuesto di Aruba, lo contribui grandemente na CAFT. Socialmente, Señora Van der Wal tawata hopi activo tambe den nos comunidad. Entre otro e tawata co-fundador di Telefoon pa Hubentud y a sirbi como presidente y miembro pa hopi aña.
Señora Helen Van der Wal ta un persona cu ta carga Aruba den su curason y ta defende Aruba y interes di Aruba na forma hopi fuerte. E tin e calidadnan cu Gobierno di Aruba ta busca den un candidato pa defende interesnan di Aruba den CAFT pa e 3 añanan cu falta.
