Algun dia pasa a tuma luga un seminario postal riba Remuneracion Integra y e aña aki Aruba tabata anfitrion. Mas o menos 22 pais a participa na e seminario aki, cual tin como meta principal trata e tarifa (remuneracion) postal cu e paisnan ta uza pa nan servicio. Paisnan manera Aruba, Corsou y Sint Maarten, a hiba debatenan activo y intenso encuanto e mehoracion futuro di servicio postal pa nos region.
Tambe a trata e topico di E-Commerce, cu ta un tendencia creciente den e paisnan miembro di UPAEP. Awendia tin servicionan postal cu 50% di nan entrada financiero ta depende di E-Commerce. Aruba tambe mester cuminsa diversifica su servicionan postal pa acomoda na e mercado creciente di E-Commerce.
Minister Chris Romero tabata presente durante e seminario pa duna apoyo na e futuro reforma di e sector postal na Aruba.
E titular di Transporte, Comunicacion y Sector Primario, a probecha e oportunidad pa duna algun palabra na esnan presente. El a haci mencion di e decisionnan cu mester tuma pa asina hiba Aruba su servicio postal den un caminda mas moderno y proactivo. Minister Romero a felicita e organisacion UPAEP pa nan excelente trabou y tambe a haci mencion special di nos servicio postal na Aruba cu ta trahando continuamente den mehoracion di su servicio.