Parlamentario Endy Croes a elabora un poco riba e situacion di pan. Siman pasa partido AVP kier a hunga populista despues cu hustamente nan mes a desgracia e pida baranca aki. Durante nan reunion na MFA Noord pa instiga pueblo hungando cu sentimiento di pueblo nan a scoge e topico di pan como ehempel. Di acuerdo cu nan propio Facebook por a tuma nota con Donkey Tromp tabata splica cu prijs di kipashi desde 1 di Juli lo bay costa Afl. 5.08. Aki nos ta kere cu Donkey Tromp lo a usa e famoso telraam di Marlon Sneek y pues converti nan mes den hendenan cu a bira un berguensa pa comunidad. Ni 5 minuut despues por a tuma nota di Carl Giel “the living dead” buscando rosea politico a duna un powerpoint presentation splicando cu prijs di pan lo aumenta y lo bay costa Afl. 4.50. Pues entre nan mes di AVP nan no tin un liña di politica y ta gaña pueblo cu prijsnan cu nan ta chupa for di nan duim. Pa bin bek riba e topico real mi mester splica lo siguiente. Actualmente e unico pan cu ta den canasta basico y ta bao control ta pan blanco cual tin un prijs di Afl. 3.45 incluyendo e aumento. Desde 2010 gobierno di AVP a pega formalmente y no a yega na un acuerdo cu e panaderonan. Door di no a duna e atencion necesario y yega na un acuerdo satisfactorio na 2010 e panaderonan a cuminsa traha “Pan Plus” cual ta cay pafor di e canasta basico y pues pafor di e control di gobierno. Pues Pan Plus ta exponi na mercado liber y e prijs di esaki panaderonan a publica cu e aumento lo alcansa un prijs di Afl. 4.08. Tanto Donkey Tromp y “the living dead” Carl Giel nan declaracionnan di 26 di Juni na MFA Noord di Afl. 5.08 (Pan Marca Donkey) y Afl. 4.50 (Pan marca the Living Dead) a keda bari completamente for di mesa. Asina nos lo caba poco poco cu e politica anticua di AVP esta un politica di manipulacion y engaño y tiramento di para. Croes a sigui splica cu ta e deseo di panaderonan pa inclui tanto pan plus y pan bruin tambe den canasta basico y asina gobierno por tin control riba e prijs pa pueblo. Pa por yega na esaki sinembargo tin un proceso unda Economische Zaken lo mester ricibi cifranan di panaderonan pa asina haci calculacionnan real riba diferente componente. Tin negosacionnan andando riba e aspecto aki entre gobierno y asociacion di panaderonan cu e miras cu lo por logra un acuerdo cu por drenta na vigor entrante Januari 2019 y asina regula prijs di pan plus y pan bruin incluyendo esakinan den canasta basico. Nos a hereda un “Desaster Financiero” for di Mike Eman pero no obstante esaki nos ta determina pa resolve tur locual Mike y AVP no por a resolve den combinacion cu drecha nos pais pa un mihor Aruba pa nos yiunan di mañan, Parlamentario Croes a termina bisando.