Den un Cas di Cultura basta yen a tuma lugar e competencia literario pa nos grandinan, Arte di Palabra 60+. Tabata un anochi yena di reatividad y caminda nos grandinan a demostra nan talento declamando un poema propio of uno existente, a conta un storia propio of uno existente y hasta un sketch a keda presenta.
En total tabatin 18 participante. Tur e participantenan ta miembro di un di e gruponan social 60+ aki na Aruba. Nos tin 32 grupo na Aruba y 11 grupo a participa na e competencia. Esakinan ta: Grupo Flor di Bini Bini, Grupo Uni, Grupo 60+ Playa Pabou, Honey Bee, Grupo 60+ FAVI, Palmita di Oro, Monarcha 55+, Grupo OPPA, Grupo Magadalena, Flor di Brazil, Samen Oud.
Sigur e competencia aki ta stimula uso di literatura na Papiamento bou di nos grandinan, pero mas cu tur cos ta aporta na engrandece esaki. Alabes ta crea e oportunidad pa nos grandinan por sigui desaroya nan mes y por desplega nan talento. Un competencia asina ta crea e posibilidad pa e grandi por traha riba su presentacion, uzo di bos, entonacion y articulacion.
Mas cu claro e ta crea e oportunidad pa nos grandinan por expresa y mustra emocion. Loke cu ami gusta mas, ta cu bo ta tende di e bida di antes, bo ta scucha e palabranan cu poco ta keda uza y bo ta keda fascina di e uzo di dicho y proverbio cu poco poco ta bayendo perdi.
Un palabra di pabien na e ganadonan di e anochi aki cu ta: Ganado di storia: Carmen Frans cu ‘Bol’i fuego’ y Shansha Koolman cu ‘E regalo nunca uza’. Ganado di poema: Martha de Miranda cu ‘Den scochi di mi wela’ y Emira (Miertje) Rodriguez cu ‘Un logro’.
Por ultimo mi kier a gradici e organisadonan cu a haci e competencia aki posibel, esta Grupo Nucleo, Cede Aruba, Departamento di Cultura, Fundacion Lanta Papiamento y Dept. di Asuntonan Social. Esaki ta demostra cu union ta haci forsa. Mi ta spera di curason cu Arte di Palabra 60+ ta bira un competencia anual structural riba calendario di actividad cultural.