Ultimo 2 simannan como 7 mil mucha a siña mas di nos cultura di San Juan
ORANJESTAD – Ayeramainta Minister di Finansa, Asuntonan Economico y Cultura mr. Xiomara Ruiz-Maduro tabata presente na Cas di Cultura y asina a pasa un rato ameno hunto cu muchanan di diferente school preparatorio y basico cu a bin pa e celebracion di Dia di San Juan Dera Gay. Departamento di Cultura tabata tin na su encargo un presentacion masha bunita y educativo cu cuenta, baile y musica dedica na e fiesta di San Juan cual nos muchanan a gosa masha hopi. Pa minister Ruiz-Maduro tabata un placer y e mandatario a gosa di wak nos muchanan biba nos cultura. Un total di casi 7 mil hoben a presencia e bunita show educativo aki ultimo dos simannan, na unda cu tabata tin competencia tambe di canto y baile entre nos muchanan. Sigur un danki di curason y un pabien na tur cu a haci e proyecto aki posibel. Nos cultura, ta nos tin cu bib’e y e celebracion di Fiesta di San Juan Dera Gay ta uno unico cual na Aruba tin un forma special y tradicional pa celebra esaki. Minister Xiomara Ruiz-Maduro, nos minister di Cultura ta invita famianan, mayor hunto cu nan yiunan pa ban celebra nos cultura di San Juan Dera Gay diadomingo awor 24 di juli den diferente distritonan aki na Aruba.