Apesar cu bo ta un persona cu no ta huma, humamento por tin efecto riba bo salud tambe. Con esaki ta posibel si bo tur dia bo ta cuida bo salud? Second-hand tobacco smoke, esta e fectonan secundario di humamento, por haci bo malo apesar cu bo mes no ta huma. Si bo ta den un lugar publico y e hendenan rond di bo ta huma, of bo ta na trabou y bo coleganan ta huma of na cas un ser keri di bo ta huma, bo ta exponi na huma y bo ta inhala e huma di tabaco aki.
Segun e American Cancer Society, e huma di tabaco tin como 7000 kimico den dje di cual un cantidad grandi di nan ta dañino y sigur como 70 ta conoci pa causa cancer den hende. E huma aki ta wordo inhala door di tur hende, incluso mucha y baby y un hende cu no ta huma por asta haya cancer di pulmon door di inhala huma di otro hende.
Muchanan ta esnan mas afecta pa e efectonan di humamento secundario ya cu nan no por evita di inhala e huma door di simplemente cana bai of bisa e adulto algo encuanto su comportacion. Estudionan ta demostra cu muchanan cu ta den un seno familiar unda tin humamento ta bira malo mas frecuente y tin mas probabilidad pa haya entre otro bronchitis y pneumonia. Hopi bes nan ta toza mas y tin tambe problema cu halamento di rosea y asta por haya infeccion di orea mas frecuente. Humamento por provoca atakenan di astma of empeora e simptomanan. Y apesar cu esakinan kisas ta mustra coi kens, pensa cuanto tempo bo ta perde na dokter cada bes cu e mucha ta malo, cuanto bes e mucha ta perde les na scol door cu e ta malo y cuanto bes kisas bo mester keda cas cu e mucha pa cuid’e door cu e ta malo. Semper ta bon pa reflexiona riba e beneficionan ora bo no ta exponi na humamento.
Apesar cu na Aruba tin un ley cu ta regarda humamento den lugarnan publico, bo no mester warda riba gobierno pa tuma accion. Bo mes por dal e prome pasonan pa cuida bo salud. Si bo ta un humado mes, bo por controla na unda bo ta huma ya asina bo sernan keri of coleganan no tin molester di esaki.
Si bo kier stop di huma, esaki tin diferente beneficio manera entre otro: despues di tempo bo tin menos risico pa haya problema cu curason, bo condicion fisico ta mehora, bo aspecto fisico ta mehora door cu bo circulacion di sanger ta mehora y bo tin mas energia.
Tin hende tin miedo di bira gordo ora nan stop di huma, pero esaki no mester ta un obstaculo. Unabes bo stop di huma, bo por cuminsa enfoca riba un estilo di bida mas saludabel, come mas saludabel y tambe mas movecion. Y esakinan ta aspectonan cu lo yudabo mantene un peso saludabel.
Koningin Wilhelmina Fonds Aruba a lansa su di dos video cu ta enfoca riba e aspecto di humamento secundario. Si bo kier mas informacion, semper por yama nos oficina na 5820412 of pasa bishita nos na Spinozastraat 9, net patras di Watertoren na Playa.