Home » Fraccion di AVP: Advertencia di CAFT a wordo anticipa pa fraccion di AVP recientemente

Fraccion di AVP: Advertencia di CAFT a wordo anticipa pa fraccion di AVP recientemente

by Admin
0 comment 84 views

 

 

Durante tratamento di presupuesto 2018, fraccion di AVP a dirigi 997 pregunta na gobierno, riba diferente punto pa tin mas claridad riba kico gobierno kier logra cu e presupuesto aki, ya cu tabata bisto cu gobierno lo no cumpli cu e normanan stipula anteriormente caminda pa 2018, gobierno mester a yega na un surplus di 0.5%.

No solamente a mustra riba diferente aspectonan di e presupuesto cu no tabata mucho cla pero na mes momento fraccion di AVP tambe  mustra riba cierto desaroyonan cu no tabata mucho cla of den ki direccion gobierno kier a bay cu su maneho financiero.

Varios aspecto a wordo atendi durante di tratamento di presupuesto pero caminda lamentablemente tanto gobierno como fraccionnan cu ta sostene e coalicion actual, a prefera di converti tur argumento den un disputa politico na luga di duna claridad riba intencionnan di gobierno cu presupuesto 2018.

E.o. miembro di fraccion di AVP, sr Richard Arends a trece diferente punto dilanti cu  tambe tabata preocupacion di CAFT y otro instancianan, sigur pa loke ta aumento di gasto di personal ya cu mientras cu gobierno a trata di duna diferente splicacion riba e aspecto di aumento di gasto di personal  pa motibo di tuma hende den servicio sin argumento adecuado CAFT tambe den su prome nota riba presupuesto tambe a señala esaki.

Cu awor CAFT a duna gabinete Wever Croes te dia 14 di juni proximo pa atende cu esaki y otro puntonan cu no ta mucho cla, tabata di spera ya cu mientras cu gobierno for di luna di december a bin ta insisti cu diferente maniobra creando loke fraccion di AVP a  cataloga omo ‘the perfect storm’ pa trata di hustifica e maniobranan politico aki.

Fraacion di AVP no a sostene e presupuesto 2018 pa motibo di preocupacion grandi relaciona cu maneho financiero pa e añanan venidero pero na mes momento e preocupacion grandi pa e hecho cu no ta mucho cla e compensacion pa mitiga  e perdida di poder di compra ta aparece un caminda den e presupuesto aki. Esaki a wordo treci dilanti den algun nota cu fraccion di AVP a publica recientemente.

Fraccion di AVP a mustra for di momento cu a trata e presupuesto 2018 den Parlamento, cu  gastonan di gobierno lo subi cu 125 miyon compara cu realisacion 2017 y cu esaki lo sigui subi structuralmente durante e proximo cuater aña.

Na mes momento nos a mustra tambe cu e defensa di coalicion na inicio di e reunion di tratamento di presupuesto cu lo  a reduci gastonan cu 20 miyon, tabata simplemente un tipo di ‘smoke screen’ y pa despues entrega cinco diferente nota di cambio y nos fraccion a mustra cu tur esaki tabata pa crea un percepcion robes cerca CAFT.

Nos a mustra cu e aumento den cantidad di personal e tempo ey cu 100 persona entre luna di januari y februari 2018 y cantidad cu ta bay sigui aumenta den e siguiente lunanan, awor ta wordo confirma pa CAFT, a pesar cu gobierno a insisti cu esaki no ta e caso.

Sinembargo ta un secreto publico aumento di personal den practicamente tur departamento di gobierno, entre otro na  Serlimar, na DIP, tambe na Departamento Social, na DVG y otro nombramento nan den diferente ministerio.

E  advertencia di CAFT ta uno veridico sigur y sin duda ta motibo di gran preocupacion ya cu mientras cu Minister Presidente  siman pasa na Hulanda y Minister di Finansa prome cu esey a trata di convence Hulanda cu esaki no ta e caso, CAFT aki na Aruba mescos cu tur hende, ta na altura di desaroyonan caminda na diferente departamento ta manda hende cas cu salario, pa emplea  miembronan of sostenedonan di partido kendenan tambe ta haya salario kisas hasta mas halto.

Pa por financia e maneho nobo aki, gobierno a anuncia e ‘crisisheffing’ di 1% pa BAZV y 1.5% pa BBO cu lo mester drenta na vigor dia 1 juli venidero cu ta trece rond di 150 miyon di florin aden anualmente. Tambe lo aumenta accijnzen cu mas cu 12 cen pa logra e meta e 10 miyon di florin cu gobierno ta premira.

Si gobierno ta mara na un norma di 0.5% di surplus pa e aña, introduccion di cualkier belasting nobo esaki lo por a wordo hustifica. Sinembargo Gobierno ta introduci un crisisheffing pa djis yega na e norma cu nos a yega tres aña pasa caba. No por yega na otro conclusion otro cu e “crisisheffing” aki ta un “coalitieheffing” pa por financia maneho nobo y Raad van Advies tambe a confirma esaki tambe den su carta na gobierno. 

Pa tal motibo tambe m persona a mustra recientemente cu den  proximo tres pa cuater aña e debe lo aumenta atrobe cu 300 miyon di florin te na momento cu yega cerca na un presupuesto balansa of surplus, caminda CAFT tambe awor  ta mustra cu loke gobierno ta haciendo no ta mustra en realidad su intencion di logra e meta aki, caminda awor gobierno tin algun dia pa atende cu e preocupacionnan di CAFT pa evita un ‘aanwijzing.”

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio