Home » Melvin Tromp di AVP: Despues di engaña pueblo a bira dificil pa gobierno engaña Hulanda y CAFT

Melvin Tromp di AVP: Despues di engaña pueblo a bira dificil pa gobierno engaña Hulanda y CAFT

by Admin
0 comment 84 views

 

Na momento  cu lidernan politico falta cu su promesanan haci na pueblo durante di campaña electoral ora cu nan asumi responsabilidad di gobernacion, esaki ta crea caos y incertidumbre den henter e  pais.

Durante di campaña electoral, lider di partido MEP kende awe ta Prome Minister, Evelyne Wever Croes y su partido, ta haci cantidad di promesa cu awor cu su gobierno no ta cumpliendo cu pueblo, Melvin Tromp di partido AVP a trece dilanti.

“E hendenan aki a drenta casnan den tur bario rond Aruba, a saca pamfleta tur caminda sigurando pueblo, cu  MEP lo tin solucion pa e situacion financiero di nos pais, sin cu mester tuma medida.

Pero tur loke pueblo por sinti di e maneho di e gobierno aki, ta aumento y mas aumento, tanto riba prijs di gasolin caminda lagando e desaroyo riba mercado mundial riba prijs di crudo afo, a aumenta accijns cu a percura pa un aumento  ainda mas halto pa pueblo.

Ta mesun lider di MEP aki hunto cu diferente miembro di su gabinete y di su fraccion den Parlamento, a sigura pueblo cu lo no tuma medida pero dentro di algun siman lo aumenta BBO y BAZV cu lo bay tin un impacto increibel den tur cas di famia y lo crea situacionnan serio financiero pa diferente famia, sigur pa esunnan  di menos entrada pero pa gabinete Wever Croes, ta amigo- y famianan ta esunnan na prome luga.

Nos a menciona na varios ocasion riba promesanan cu lider di MEP a haci na pueblo, reduccion di prijs di awa y coriente, reduccion di prijs di gasolin, eliminacion di placa di scol, eliminacion di pago di prima di AZV pa pensionadonan, eliminacion di Aruparking, reduccion di transporte publico y cantidad di otro punto mas, pero awor e realidad ta Sali na cla cu gabinete Wever Croes no por cumpli cu ningun di e promesanan haci aki.

E carta di CAFT dirigi na Minister di Finansa siman cu a pasa, no ta ningun sorpresa sigur ora cu realisa cu Aruba tin un gobierno cu no tabatin y no tin ainda un plan di maneho, no tin nocion di kico pa haci y ta gobernando pa un grupo selecto di amigo-, famia- y sponsornan lagando pueblo un banda y na merced di un pakete di medida cu lo bay percura pa un cantidad di problema social y financiero pa nos comunidad.

Constantemente por scucha pretextonan, por scucha di debe nacional grandi pa despues Minister di Finansa sigura siman pasa cu gobierno tin cu inverti den proyectonan mescos cu Gabinete Mike Eman I y II a haci pa sigura e desaroyo economico y financiero di nos pais.

Ya caba ta anticipa cu gabinete Wever Croes den proximo añanan,  si Hulanda y CAFT permiti esaki, lo por aumenta e debe nacional cu mas cu 300 miyon florin pero mientras cu esaki ta ser premira, ningun caminda por mira na unda gobierno ta mustrando seriedad den su intento pa baha gasto di personal y di maneho.

CAFT ya no ta kere den storia, ya cu e storia cu Minister di Finansa y Minister Presidente a bay conta na Hulanda no ta realistico ya cu mientras cu  gran fanfaria a mustra cu a tuma medida contra pueblo, di otro banda ministernan di e gabinete ta tumando cantidad di hende na trabou aumentando e gasto di persona barbaramente.

For di e prome lunanan caba di gobernacion, Prome Minister a anuncia di a manda 300 hende cas cu tabata liga na gabinete anterior pero CAFT den su reaccion a mustra riba un aumento di 100 trahado mas loke ta indica cu den e prome lunanan aki, gabinete Wever Croes a tuma 400 hende den servicio.

Fuera di e grupo aki,   cantidad di nombracion ta wordo haci na practicamente tur ministerio, mandando trahadonan cas cu salario y nombrando nobonan cu ta aumenta e gasto di salario inmensamente.

CAFT tambe a tuma nota di esaki caminda gobierno no por sconde mas y a mustra gabinetWever Croes cu e tin cu bira serio y tuma medidanan adecuado pa elimina e maniobranan aki y den forma bon cla a mustra gobierno cu si esaki no tuma luga, gobierno di Reino lo  bin cu KB pa gabinete Wever Croes pa falta di seriedad y responsabidad,” sr Melvin Tromp di AVP a mustra.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio