Parlamentario Alan Howell lo keda tras di e proyecto pa sigura cu Biblioteca San Nicolas lo habri su portanan bek cuminsamento di aña escolar nobo

Papiando riba e situacion di Biblioteca San Nicolas, Parlamentario di Fraccion di POR, Alan Howell a expresa cu tin preocupacion pa cu e forma con esaki ta moviendo mirando cu e ta tardando hopi. Intencion tabata pa e biblioteca haya un renobacion y lague practicamente nobo, pero cierto aspectonan a strobe e proyecto di cana manera debe ser.
Mencionando algun di e aspectonan aki, Howell a menciona e lift y otro cosnan chikito.
Teniendo na cuenta e importancia di e biblioteca aki pa Pariba di Brug, Alan Howell a haci su investigacion y por a compronde di e directora di biblioteca cu si tur cos bay bon pa cuminsamento di e aña escolar nobo, e biblioteca na San Nicolas lo ta cla pa uzo di tur hende.
Pesey mes, Alan Howell a haci un un yamada na e habitantenan di Pariba di Brug, pa carga un tiki mas di pasenshi. E mes lo ta tras di e proyecto aki, pa e keda cla mas pronto cu ta posibel y asina scol habri por tin e biblioteca bek manera debe ser.