Sra. Jacqueline van Putten ta encarga pa mas cu 15 aña cu admision di studiantenan na CIOS (Centrale Instituut voor de Opleiding tot Sportleiders) cu ta un estudio pa formacion deportivo riba nivel di MBO cu na final ta conduci na un profesion den cual deporte y ehercicio ta e meta principal. Sra. van Putten a duna e grato noticia cu studiantenan di Aruba ta cla pa sigui nan estudio na CIOS cu ta keda na Arnhem, Hulanda. Pa wordo admiti na CIOS, cada studiante mester pasa un test fisico , test di Hulandes y rekenen cu ta wordo haci online y despues ta sigui cu un combersacion di registracion.
Diahuebs 24 di mei bou guia di sr. Martin van Wijk cu ta un docente na CIOS Arnhem y sra. Jacqueline van Putten a tuma lugar un combersacion di registracion cu cada studiante y na final 5 studiante a haya conseho positivo pa nan por sigui nan estudio na Hulanda na september 2018.
Jacqueline van Putten ta indica cu gobernacion pa e periodo di 2017-2021 , tin como meta pa stimula un bida sano y activo bou di henter nos población y den e cuadro aki Minister di Deporte y Salud lo enfoca riba e.o. profesionalisacion di nos sector di deporte, promocion di deporte riba tur nivel (escolar, recreativo y competitivo) y conscientisacion riba e importancia di deporte pa nos salud.
Teniendo na cuenta cu e enfoke aki, Minister Dangui Oduber a sinta cu Sr. Martin van Wijk y Sra. Jacqueline van Putten y a palabra cu lo traha conhuntamente riba un plan di maneho riba “deporte den bario” unda CIOS Arnhem ta desea di duna nan sosten riba diferente tereno.
Minister Dangui Oduber ta desea e cinco studiantenan aki hopi exito cu nan estudio na CIOS Arnhem y a indica cu nan ta forma parti di e futuro di nos desaroyo deportivo aki na Aruba.