Empleadonan ta conta cu un agenda yen di eventonan henter aña
ORANJESTAD, Aruba – Den fin di siman e programa di e Caminata MetaFit 2018 a continua. E mainta a cuminsa trempan, cu boluntario y participantenan cu a yega trempan pa prepara nan mes pa e caminata. E caminata a sali pa 6’or di mainta, tur participante a sali y termina na Fisherman’s Hut
Devin de Veer di e MetaFit Committee, a inicia e caminata, unda tanto adulto como hoben y mucha a cana y core 5 KM y 9 KM. Tur tabata busca pa mehora nan tempo pa asina nan ta bon prepara pa e caminata grandi di e programa di MetaFit dia 1 di Juli 2018. E prome coredo a yega den 23 minuut di tempo y asina aki poco poco cada un participante a sigui yega.
E programa di caminata y coremento di MetaFit ta continua pa 4 siman, unda e participantenan ta busca pa mehora nan tempo pero tambe pa sigui cu e programa. Gerencia di MetaCorp tambe tabata presente e mainta aki unda tin cu a participa y otro tabata encurasha participantenan na final. E mainta aki a conta cu presencia di iRun, PatrishiSports, IBiSA, Harley Motor Unit, Crus Cora y boluntarionan di MetaCorp. Tur hende a termina e mainta aki contento.
Separa di MetaFit, e compania MetaCorp y su subsidiarionan tin un programa amplio di eventonan deportivo, social, cultural, educacional. Di e forma aki e compania ta demostra nan compromiso cu nan empleadonan. E cultura di compania, basa riba custumber di casi 100 aña, ta inverti hopi den e factor humano, den un esfuerso pa tin empleadonan contento, cu na nan turno ta brinda bon servicio na clientenan.