Siguiendo e desaroyo di prijs di crudo internacionalmente, nos por nota un subida constant den e prome parti di aña 2018. Esaki lo tin su efecto riba nos tambe, pasobra e por tin su efecto riba prijs di gasolin. Subida di prijs di crudo por tin efecto riba prijs di gasolin debi na e desaroyo internacional y con esaki ta wordo calcula. Tur pais na mundo ta mirando e desaroyo aki cu hopi preocupacion. Gobierno di Aruba tambe ta alerta pa e desaroyo aki pa e no tin un impacto demasiado grandi na Aruba.
Pa varios aña caba e forma pa calcula prijs di gasolin na Aruba ta mescos y bou encargo di Departamento di Asuntonan Economico cu ta calcula esaki basa riba e prijs di crudo di e luna anterior. Den e rapport ‘Economic Outlook 2018’ di Banco Central ta indica cu prijsnan di crudo internacionalmente ta subiendo. Segun fuentenan internacional, prijs di crudo pa liter a subi luna pasa y te hasta na e nivel di mas halto den 3 aña. E crisis na Venezuela tambe indudablemente ta afecta e prijs di gasoline internacionalmente.
E fluctuacionnan aki sinembargo, segun West Texas Intermediate Crude Oil Prices’ (WTI), lo ta temporario. Si e prijs di crudo sigui subi, Aruba lo mester adapta na e prijs mientras e prijs di crudo ta subi internacionalmente pasobra asina esaki ta wordo calcula na Aruba.