Recientemente a tuma lugar na nos isla ruman Corsou, e conferencia di Reino riba Derecho di Mucha. Un conferencia anual pa conhuntamente keda apoya y asisti otro den percura pa e derecho sagrado di cada criatura cu ta nan cuido, proteccion, siguridad, bida digno, cu otro palabra e derecho total y completo.
Esaki tabata e di 3 conferencia cu a tuma lugar, un conferencia cu e aña aki a conta cu un asistencia di 120 stakeholders di henter Reino, 28 total di Aruba indicando caba con importante esaki ta pa tur hende. E conferencia a conta cu presencia di Ministernan di Corsou, Sint Maarten, Diputado di Boneiro, Gezaghebber di Saba, Representante oficial di Gobierno di Hulanda, y di Aruba tabata presente Minister Glenbert Croes.
“Tabata un honor di por a mira e plan di accion di Aruba riba e tereno aki. Tur ta consciente cu ainda tin hopi pa haci pero e miembronan di Aruba tur ta sumamente motiva, dedica y trahando cu pasion pa por logra e miho pa nos muchanan”, tabata expresion di e mandatario.
Pronto e plan di accion ta drenta den su ehecucion aki na Aruba pa hunto conscientisa henter nos Pueblo di e importancia di e derecho di nos muchanan den e mas amplio sentido dje palabra.
Durante henter e conferencia Rishandroh y Roshendrick tabata constantemente den mente di tur hende. Nan ta e motivacion pa duna tur di nos banda pa percura pa nos muchanan por tin un hogar, scol, cuminda y un bario trankil y sigur cu ta proteha nan.
Minister Glenbert Croes ta gradici di Pais Corsou enormemente pa e hospitalidad.