Manera Prome Minister Evelyn Wever-Croes a anuncia na maart, Gobierno a haya su mes forsa pa introduci un crisosheffing temporal di 2.5% debi na e situacion financiero malo di Gobierno.
Gabinete Wever-Croes, desde e prome dia di gobernacion, mester a atende cu hopi reto. Retonan social. Retonan cu pais bisiña. Retonan financiero. Mesora a lora manga y a cuninsa traha. A prepara un plan financiero, e FEM, y a cuminsa tuma accion.
Prome a baha gastonan di e ministernan mes. A baha cantidad di personal di ministernan. Minister President mes tin apenas 10% di e cantidad cu ex minister Mike Eman tabata tin, y ta haciendo miho trabou cu tempo di Eman.
Despues a baha gasto di aparato gubernamental. Tambe a pidi companianan estatal pa baha gasto y contribui cu mas dividendo.
Finalmente a traha riba cobra belasting di tur hende, especialmente esnan cu actualmente no ta pagando belasting. Pero tur esaki no ta suficiente principalmente debi na dos factor.
E prome ta e proyectonan PPP pa cual entrante otro aña mester paga 80 miyon florin pa aña pa sigur 20 aña. Esaki ta un peso cu nos presupuesto normal no por carga. Tambe e crisisplan social, pasobra despues di e morto di e dos angelitonan na november, a bira mas cla cu nunca cu e crisisplan social no por wordo pospone mas. E plan aki ta costa 32 miyon florin.
CRISISHEFFING TEMPORAL 2.5%
Esaki a forsa Gobierno bin cu un crisisheffing temporal di 2.5%. 1% ta bay pa BAZV y 1.5% ta bira e B-AVP. Cu ta destina pa paga e proyectonan PPP.
Intencion di Gobierno ta pa traha cu tur energia pa trece e reforma fiscal cu lo duna un sistema di belasting mas husto. Asina cu e reforma fiscal ta cla, e crisisheffing lo pasa pa pasado.
COMPENSACION
Gobierno mesora a bin tambe cu compensacion pa esnan mas vulnerable den nos comunidad, cu total ta costa 20 miyon florin. Pensionadonan porfin ta haya alivio den e prima di AZV cu nan ta paga, di 10.5% te na 6.5%. Esaki ta duna un alivio na 17 mil pensionado y sigur ta un cambio positivo hopi grandi.
Tambe ta aumenta e reparatie toeslag pa tur esnan cu ta gana menos di 2500 florin, cu 20 florin y pa pensionadonan cu pensioen di biehes so, cu 25 florin.
Aparte di esey a baha loonbelasting y inkomstenbelasting cu 2% pa esnan cu ta gana te 3.100 florin.
E compensacionnan aki ta costa 20 miyon florin cu Gobierno ta duna bek na comunidad.
Parlamento a aproba e crisisheffing, despues di pasa dos amienda y despues cu Parlamento y Gobierno a pone bon cla cu nan ta indiga y desgusta cu nan mester coregi erornan di Gobierno anterior.
“Nos mester actua awor, e situacion no ta permiti pa pospone mas. No ta facil, pero ta lo corecto pa asina nos libra nos yuinan y nan yiunan di e peso di mal maneho di gobiernonan anterior” segun Prome Minister Evelyn Wever-Croes