Durante tratamento di e ley di “coalitieheffing” fraccion di AVP a lamenta cu e grupo di mas vulnerabel no ta haya compensacion debido, manera ambtenaarnan y esunnan cu ta cobra onderstand. Tambe e ‘reparatietoeslag’ di nos grandinan tambe ta wordo elimina y esaki ta di lamenta. A resultad cu e pensionadonan mes mester paga nan reduccion di prima di AZV cu eliminacion di reparatietoeslag. Un gobierno cu tin ‘hende central’ como su lema, no ta refleha esaki bek den e ley y tin otro formanan pa haci e ley aki pero gobierno a opta pa pas’e asina cu sosten di e partidonan den coalicion.
Sinembargo, e ley cu ta introduci e “coalitieheffing” no solamente ta perhudica e poder di compra di nos grandinan, ambtenaarnan y esunnan cu ta cobra onderstand, pero empresanan chikito y trahadornan independiente tambe ta wordo afecta grandemente pa e introduccion di e “coalitieheffing” aki y e cambionan fiscal cu a wordo presenta.
E exoneracion di BBO of BAZV pa empresanan cu ta genera 12.000 florin pa aña no ta duna e estimulo necesario pa e empresa chikito, ni tampoco e trahado independientemente, ni tampoco na e e ‘young professional’ cu ta cuminsa cu su propio negoshi den un di e top-sectornan. Ademas for di prome di juli lo mester paga BBO y BAZV riba servicionan financiero, seguronan di biahe y di auto. “Esaki siguramente lo aumenta e gastonan pa haci negoshi aki na Aruba, frenando asina e crecemento di empresanan mediano y chikito cu ta esencial pa nos desaroyo economico,” Parlamentario Richard Arends a declara.
Como fraccion nos a haci nos huiswerk y a entrega 235 pregunta. Como cu Gobierno a contesta unicamente 16 di e preguntanan di nos fraccion, durante tratamento di e ley mi mester a opta pa hasi un peticion na minister pa contesta por lo menos e preguntanan mas importante den e relato cu ta netamente refleho di e discusionnan cu fraccion di AVP a hiba cu esunnan cu ta wordo afecta directamente. Gobierno a keda sin duna splicacion riba temanan specifico cu ta afecta poder di compra di famianan, como tambe empresanan chikito y mediano, manera e transicion pa impuestonan indirecto sin un compensacion completo pa esunnan di mas vulnerabel, riba limitacion di deduccion di interes riba hipoteca, limitacion di exoneracion di BBO y BAZV pa seguronan y servicionan financiero.
Ley cu ta regla e “coalitieheffing” ta wordo trata den Parlamento sin conseho, sin consulta y sin ningun pronostico macro economico pa loke ta su efectonan pa esunnan di mas vulnerabel como tambe negoshinan y empresanan chikito. Un ley c’un embergadura hopi grandi caminda gran parti di e 130 miyon florin cu gobierno a presupuesta pa tin como entrada e aña aki, ta wordo regla cu e ley aki. E entradanan aki ta netamente pa cubri e intensificacion di 125 miyon di florin compara cu realisacion di 2017 cu gastonan cu CAFT tambe a remarca.