ORANJESTAD – Coleganan di Fraccion MEP, Daphne Lejuez, Rocco Tjon, Setty Christiaans-Yarzagaray y Endy Croes a reuni cu miembronan di e team di TNO Caribbean na Aruba e siman aki. E reunion a encera entre otro un presentacion di locual TNO ta haci, y tambe e proyectonan cu nan a ehecuta hunto cu sondeonan cu nan ta haciendo pa Aruba.
Presente na e reunion tabata sr. Eric Veldkamp (Managing Director, TNO), sr. Robert-Jan Moons (Program Manager) y sr. Greg Ras (Test & Certified Engineer). E fraccion a haya un splicacion tambe di e areanan di trabou cu nan ta cubri cu respaldo tambe di TNO na Hulanda, unda nan tin un netwerk di mas di 2500 colega cu nan por pidi pa conseho y asistencia riba diferente area. “E reunion cu TNO tabata uno hopi interesante y educativo durante cual fraccion di MEP a haya un miho bista riba e tipo di trabounan cu TNO por yuda Aruba cune, y con TNO por conseha gobierno pa trece mehoracion den cierto areanan, manera por ehempel reduccion di gasto por medio di innovacion”, parlamentario Lejuez ta expresa. Como presidente di comision fiho di Innovacion, Ciencia, Energia y Desaroyo Sostenibel di Parlamento, sra. Lejuez a palabra cu lo extende un invitacion na TNO pa duna un presentacion na Parlamento di e diferente rapportnan y proyectonan cu nan ta traha pa Aruba. Parlamentario Lejuez: “Y tambe con por saca miho probecho di e relacion cu TNO Caribbean pa asisti nos den soluciona varios di e retonan cu nos ta enfrenta riba e area di sostenibilidad.”
Areanan di enfoke
Pa Aruba pa 2018, TNO Caribbean ta enfoca riba varios area. Riba e tema di desaroyo sostenibel por ehempel, aki por pensa riba Smart Communities. Tambe riba proyectonan sostenibel den educacion cu minister di Enseñansa por medio di crea capacidad, pues pa crea un ‘knowledge-economy’ berdadero. Pa locual ta maneho di desperdicio y proteccion di nos medio ambiente, na momentonan aki nan ta asisti minister di Desaroyo Teritorial, Infrastructura y Medio Ambiente cu un proyecto di desperdicio. Un otro area di enfoke ta siguridad di cuminda. “Hunto cu Santa Rosa, e meta ta pa busca solucion con pa yuda nos cunukeronan cu e desafionan cu awa door di por ehempel considera aquaponics y/of hydroponics. Esaki ta yuda reduci dependencia di exterior pa nos necesidad riba un nivel comercial, pero tambe personal na unda cada ciudadano lo por cultiva su propio alimento y come mas saludabel”, segun parlamentario Lejuez ta splica. Por ultimo tin e tema di Cyber Security. Akinan e enfasis ta con pa crea un infrastructura sigur pa limita hacking di informacion, un proyecto unda cu lo ta trahando conhuntamente cu ministerio di Husticia. Tambe TNO Caribbean ta traha riba consehonan general pa locual ta diferente area di atencion pa gobierno.
Reduccion di gasto di energia
Algun di e rapportnan cu a wordo menciona por medio di TNO Caribbean y cual a resalta tabata e rapport titula: ‘Energy Savings Potential in Government Buildings’. Esaki ta un rapport unda cu lo a haci un sondeo pa e posibilidad di reduci e costo di energia di edificionan gubernamental, y unda cu lo por a identifica por lo menos un miyon florin di reduccion durante e prome aña di implementacion. Parlamentario Lejuez: “Un rapport cu a wordo presenta na gobernacion anterior pero no a wak implementacion.”
Aruba Marine Park
Adicionalmente tambe fraccion MEP a wordo informa di e rapport cu ta wordo traha pa Departamento di Naturalesa y Medio Ambiente tocante Marine Park pa Aruba. Esaki ta un rapport cu a wordo sosteni y financia completamente pa Union Europeo y TNO Hulanda cu ta cubri varios aspecto con pa lanta e parke marino aki pa Aruba. Y tambe pa maneha cuater area maritimo di proteccion bou di e parke aki. Parti di e proyecto aki ta inclui sondeo, e leynan necesario, y tambe e maneho di e parke. Una bes cu e rapport aki ta cla, e lo keda entrega na Departamento di Naturalesa y Medio Ambiente. “Interesante ta si cu e proyecto di Aruba Marine Park tin mas di ocho aña caba ‘in the making’, mirando cu ya tabata tin presentacionnan riba e proyecto aki den pasado cu procesonan basta avansa”, parlamentario Lejuez ta enfatisa.