ORANJESTAD – E siman cu a pasa, comision fiho di Parlamento pa Asunto Economico y Finansas a ricibi miembronan di directiva di Camara di Comercio (Kvk) cu a pidi un reunion cu Parlamento pa por papia riba algun topico di interes. E topiconan a encera entre otro finansas publico, perspectiva economico, desaroyo economico pa San Nicolas, Citgo, Incubators y varios otro tema.
“Esaki tabata un reunion hopi informativo cu ta mustra e beneficio di contacto y participacion regular entre sector priva y sector publico pa por logra progeso pa nos pais y nos hendenan”, Parlamentario Daphne Lejuez ta expresa. Pa San Nicolas, Camara di Comercio lo desea di mira un desaroyo economico sostenibel den industrianan nobo tecnologico y creativo. Y tambe nan ta duna nan sosten completo na e proyecto di Ferry cu lo por ta un di e catalisadornan pa e desaroyo aki tuma lugar. “Aki tambe a papia di e importancia di tin cierto leynan implementa, manera por ehempel un ley di privacidad optimalisa cu ta cumpli cu rekisitonan di GDPR. Den e forma aki por atrae inversion y desaroyo riba nivel tecnologico, expande den areanan di e-commerce riba nivel local y tambe e uso di firma digital”, segun parlamentario Daphne Lejuez ta subraya.
Negoshi mas stabiel
E reunion aki tabata uno sumamente interesante unda cu Camara di Comercio a comparti tambe diferente plan pa conhuntamente cu sector priva stimula e desaroyo di ‘incubators’. Mirando cu a constata cu hopi negoshi ta cera den apenas 1-2 aña di operacion – pues haciendo uzo di ‘incubators’ lo por asisti y guia empresarionan nobo cu conseho y acceso na servicionan comparti na costonan razonabel. Parlamentario Lejuez: “Pa asina den un periodo di tres aña nan por tin un negoshi mas stabiel y por continua cu esaki.”
Entrepreneurship
Adicionalmente Camara di Comercio a comparti cu nan ta trahando cu minister di Enseñansa riba e posibilidad di inclui entrepreneurship den curiculo escolar. Pa asina promove esaki desde un edad mas jong pa stimula un atmosfera empresarial. Ademas di esaki, a splica parlamentarionan presente di Camara di Comercio su aporte na e iniciativa di ley ‘Economisch Herstelwet’ di gobierno. Esaki ta pa por stimula nos economia y asina aki por crea mas inversion y consecuentemente mas cupo di trabou.