Durante ultimo dianan aki nos por a tuma nota cu un total di no 1 pero 300 persona o famia ta bin na remarke pa hanja un tereno. Un total di 300 tereno a wordo poni disponible na personanan cu ta cumpli cu rekesitonan stipula door di e departamento di DIP. Sigur algo cu den ultimo 8 aña di tempo nos no por a wak. Pero si nos por a tende con negoshi tawata wordo hasi cu terrenonan commercial door di cierto gruponan.
300 tereno sigur no ta algo chiquito, paso esaki tambe lo sa di duna un empuhe economico enorme na e economia di Aruba. Imaginabo si e 300 famianan aki construi un cas cu costa rond di 125.000 ta significa un boost economico di mas cu 35 miyon florin. Esaki den forma di e contratista cu lo wordo contrata, e materialnan di construccion cu lo mester wordo cumpra, y asina nos por sigui menshona. Pero e no lo keda unicamente na e 35 miyon aki, paso ainda falta por ehempel un instalashon di gas y bisa si esaki costa 500 florin pa cada hogar, Arugas lo hanja un empuhe economico di riba 100.000 florin. Unabez e casnan aki keda cla, ainda falta e parti di inrichting. E set di sala, e set di cama, e set di cushina y asina por sigui menshona, cual atrobe lo duna un otro empuhe economico na diferente companianan local cu ta brinda e servicionan aki. Y sin lubida e fair share cu gobierno lo ricibi di esaki tambe.
Mane indica durante campaña 2017 unda cu nos a encontra hopi di nos cuidadanonan wardando añas pa por jega na nan propio tereno pa asina por construi nan propio cas, ta birando un realidad bou di maneho di nos Minister actual, esta Minister Otmar Oduber.
Sigur e no tawata un proceso facil. Pesey mes cu bon coperashon DIP esaki tawata posibel. Un palabra di pabien tambe pa esnan di DIP cu sigur a pone nan esfuerso pa por hasi esaki realisabel.
Di e forma aki tambe ta crea e transparencia asina anhela door di pueblo y tambe e eficiencia. Unda sigur e punto di salida ta cu peticionnan mester wordo trata mas diligentamente y mas tanto posibel den e secuencia cu nan wordo hasi. E no ta por ta asina cu un persona mester warda mas cu 10 anja pa por logra jega na un tereno pa asina por construe su cas. Sigur na e manera aki por jega na un maneho balansa y ta evita cu negoshinan por wordo hasi cu tereno erfpacht. Y a base di e transparencia y claridad pa un y tur ta hasi cu un ta menos dependiente di un minister pa jega na su propio tereno.